काठमाडौं– भारत र इजरायल व्यापार विविधीकरण गर्न सहमत भएका छन् । भारतका उद्योग वाणिज्यमन्त्री पियूष गोयल र इजरायलका अर्थ तथा उद्योगमन्त्री निर बारकातबीच भएको भेटवार्ताका क्रममा यस्तो सहमति भएको हो ।

भारतीय समाचार संस्था एएनआईका अनुसार दुई मुलुकका मन्त्रीबीच फ्रान्सको राजधानी पेरिसमा भेटवार्ता भएको हो । भेटवार्ताका क्रममा दुई जनाबीच व्यापार विविधीकरणका साथै नवप्रवर्तन, अत्याधुनिक प्रविधि र उदीयमान क्षेत्रमा सहकार्य गर्ने विषयमा पनि सहमति भएको छ ।

फ्रान्समा रहँदा मन्त्री गोयलले त्यहाँका लगानीकर्तालाई भारतमा लगानी गर्न पनि आग्रह गरेका थिए । उनले दुई मुलुकबीच बलियो व्यापारिक सम्बन्ध रहेको भन्दै आपसी हितलाई मध्यनजर गर्दै भारतमा लगानी गर्न फ्रान्सेली कम्पनीलाई आह्वान गरेका थिए ।

फ्रान्समा रहँदा मन्त्री गोयलले विश्व व्यापार संगठन डब्लूटीओकी महानिर्देशक न्गोजी ओकोन्जो इवेआलासँग पनि भेटवार्ता गरेका थिए । भेटवार्ताका क्रममा मन्त्री गोयलले भारत सदैव निष्पक्ष, स्वतन्त्र, समावेशी र नियममा आधारित बहुपक्षीय व्यापार प्रणालीको पक्षमा रहेको उल्लेख गरेका थिए ।