काठमाडौं– सत्तारुढ नेपाली कांग्रेस र नेकपा एमालेले गृहमन्त्री रमेश लेखक जोडिएको भिजिट भिसा प्रकरणसहितका भ्रष्टाचारको छानबिन गर्ने प्रतिवद्धता जनाएका छन् । 

संघीय संसद् भवनमा बिहीबार बसेको सत्तापक्ष र प्रतिपक्षी दलहरूको बैठकमा कांग्रेस–एमालेले भिजिट भिसा प्रकरणसहितका भ्रष्टाचारको छानबिन गर्ने साझा प्रतिवद्धता जनाएका हुन् ।   

कांग्रेस र एमालेका उक्त साझा प्रतिवद्धतापछि प्रमुख प्रतिपक्षी नेकपा माओवादी केन्द्र र नेकपा एकीकृत समाजवादी जेठ पहिलो १३ देखि सुरु भएको संसद्को गतिरोध हटाउन तयार भएका छन् । 

एमालेका एक नेताले खबरहबलाई बताएअनुसार दुई दलको साझा प्रतिवद्धतामा असन्तुष्ट राष्ट्रिय स्वतन्त्र पार्टी (रास्वपा)लाई मनाउने वचन माओवादी केन्द्रले बैठकमा दिएको छ । 

‘हामीले छानबिन या संसदीय समिति बनाउने कुरामा सहमति गरेको होइन,’ ती नेताले भने, ‘हामी दुई दल भ्रष्टाचार र अनियमितताबारे छानबिन गरी सुशासन कायम गर्न प्रतिवद्ध रहेकाले प्रतिपक्षी दलहरू त्यस कुरामा कन्भिन्स भएर संसद्को गतिरोध हटाउने दिशामा अघि बढेका छौँ ।’