काठमाडौं– स्थापनाको एक दशक पूरा भएको अवसरमा गीताप्रेस नेपालले आधिकारिक वेबसाइट एवं मोबाइल एप सार्वजनिक गरेको छ । बिहीबार वनकाली पशुपतिमा आयोजित कार्यक्रममा गीताप्रेस नेपालले वेबसाइट एवं मोबाइल एप सार्वजनिकसँगै श्रीलिङ्गमहापुराण र श्रीमत्स्यमहापुराणको नेपाली अनुवाद विमोचन पनि गरेको छ ।

बिहीबार गीताप्रस नेपाल पुस्तक बिक्री केन्द्र काठमाडौंका अध्यक्ष जय किसन साडाले नेपालमा गीताप्रेस गोरखपुरको अन्तर्राष्ट्रिय शाखा वि.सं. २०७३ जेष्ठ २९ गते विधिवत् उद्घाटन भइ सञ्चालनमा रहेको जानकारी दिए । 

उनले गीताप्रेसबाट प्रकाशित भएका कृतीहरूको प्रचार प्रसार एवं आम सर्वसाधारणले अनलाइनको माध्यमबाट पुस्तकहरू निःशुल्क अध्ययन गरी आध्यात्मिक एवं धार्मिक लाभ लिन सकुन् भन्ने अपेक्षा रहेको बताए । उनले उक्त एप तथा वेबसाइटमा गीताप्रेसबाट प्रकाशित पुराण, रामायाण, उपनिषद, स्तोत्र, चालिसा, नित्य पाठ, कर्मकाण्ड, भजनसहित महत्त्वपूर्ण लेख रचनाहरूलाई समावेश गरिएको जानकारी दिए ।