काठमाडौं – दक्षिण भारतीय नायक राम चरणको फिल्म ‘द इन्डिया हाउस’को सुटिङ सेटमा दुर्घटना भएको छ । भारतको हैदराबादको छायाङ्कन स्थलमा दुर्घटना भएको हो ।

सुमुद्रको दृश्यका लागि जम्मा पारिएको पानी नियन्त्रण बाहिर जाँदा दुर्घटना भएको भारतीय मिडिया टाइम्स अफ इन्डियाले उल्लेख गरेको छ ।

समुद्रको दृश्यका लागि जम्मा गरिएको पानी खोल्ने क्रममा यो दुर्घटना भएको हो । यस दुर्घटानमा केही प्राविधिकहरु घाइते भएका छन् भने सुटिङ सेट जलमग्न भएको छ ।

पानीमा डुबेर सेटमा रहेका क्यामेरा, लाइट र प्रप्सलगायतका सुटिङ सामाग्री बिग्रिएको छ । यसले करोडौंको क्षति पुगेको अनुमान गरिएको छ ।

टाइम्स अफ इन्डियाका अनुसार दुर्घटनामा एक सहायक कोरियोग्राफर र ड्राइभरहरु घाइते भएका छन् । उनीहरुलाई नजिकको अस्पतालमा भर्ना गरिएको छ ।

दुर्घटानका कारणा हाललाई फिल्मको छायाङ्कन रोकिएको छ । सेट पुनर्निर्माण भएपछि पुन: छायाङ्कन सुरु गर्ने निर्माण पक्षले बताएको छ ।

दुर्घटनाको समयमा राम चरण र शीर्ष कलाकारहरु सेटमा अनुउपस्थित रहेको बुझिएको छ । यस फिल्मको निर्मातामध्ये एक नायक राम चरण पनि हुन् ।