काठमाडौं– प्रमुख प्रतिपक्षी नेकपा माओवादी केन्द्रले पत्रकार दिलभूषण पाठकविरुद्ध जिल्ला अदालतबाट जारी पक्राउ पुर्जी फिर्ता लिन माग गरेको छ । 

माओवादी केन्द्रले बिहीबार विज्ञप्ति जारी गरेर पत्रकार पाठकविरुद्ध जारी भएको पक्राउ पुर्जी फिर्ता लिन माग गरेको हो । 

‘माओवादी केन्द्र स्वतन्त्र, जिम्मेवार र तथ्यमा आधारित पत्रकारिताको सधैँ पक्षधर रहेकोले प्रेस तथा अभिव्यक्ति स्वतन्त्रताविरुद्धका गतिविधि नगर्न र सञ्चारकर्मीमाथि जारी पक्राउ पुर्जी फिर्ता लिन जोडदार माग गर्दछ,’ प्रवक्तासमेत रहेका उपाध्यक्ष अग्निप्रसाद सापकोटाद्वारा जारी विज्ञप्तिमा भनिएको छ ।

माओवादी केन्द्रले लोकतान्त्रिक मर्मविरुद्ध सरकारले प्रत्यक्ष रुपमा पक्राउ पुर्जी जारी गरेर असहिष्णुता र दमनको नीति लिएको पनि आरोप लगाएको छ । 
 
‘समाचार सामग्रीमा त्रुटि, पूर्वाग्रह वा तथ्यगत कमजोरी देखिएको छ भने त्यसको समाधानका लागि प्रेस काउन्सिललगायतका नियामक निकायमार्फत खण्डन गर्ने वा प्रतिवाद गर्ने विधि स्थापित छ,’ विज्ञप्तिमा भनिएको छ, ‘तर सरकारले प्रत्यक्ष रुपमा पक्राउ पूर्जी जारी गरेर असहिष्णुता र दमनको नीति लिएको छ, त्यो लोकतान्त्रिक मर्मविरुद्ध छ ।’ 

जिल्ला अदालतले नेपालखबर डटकम र बिजमाण्डु डटकममा प्रकाशित समाचार हटाउन दिएको आदेशप्रति पनि माओवादी केन्द्रले आपत्ति जनाएको छ। 

‘सरकारको यस प्रकारको कार्य प्रेस स्वतन्त्रता, लोकतान्त्रिक मूल्य–मान्यता र संविधानले प्रत्याभूत गरेको अभिव्यक्ति स्वतन्त्रताको भावना विपरित छ,’ माओवादीले भनेको छ ।