काठमाडौं– नेपाली कांग्रेसका नेताहरू उत्तरी छिमेकी मुलुक चीन भ्रमणमा जाने भएका छन् । केन्द्रीय सदस्य बलबहादुर केसीको नेतृत्वमा कांग्रेस नेताहरू साताव्यापी चीन भ्रमणमा जान लागेका हुन् । 

चिनियाँ कम्युनिस्ट पार्टीको निमन्त्रणमा आफूहरू बिहीबार रातीको उडानबाट चीनको बेइजिङ जाने तयारी रहेको नेता केसीले जानकारी दिए । उनकाअनुसार कांग्रेसको भ्रमण टोली राति ११ः३० बजे काठमाडौंबाट चीनको गोन्झाओ हुँदै शुक्रबार दिउँसो बेइजिङ पुग्ने कार्यक्रम छ ।

‘चिनियाँ कम्युनिस्ट पार्टीले नेपाली कांग्रेसलाई पार्टी टु पार्टी छलफलका लागि आमन्त्रण गरेको हो,’ केन्द्रीय सदस्य केसीले खबरहबसँग भने, ‘पार्टीले मलाई टोलीको नेतृत्व गरेर जान जिम्मेवारी दिएको छ । हामी १७ जना चीन जान लागेका छौँ ।’ 

नेता केसीले चीन भ्रमणमा जानुअघि बिहीबार बिहान पार्टी सभापति शेरबहादुर देउवासँग भेट गरेर सरसल्लाह गरेका छन् । यसअघि केसीले इतर समूहको नेतृत्व गर्दै आएका केन्द्रीय सदस्य डा. शेखर कोइराला र महामन्त्री गगनकुमार थापासँग पनि भेटघाट र सरसल्लाह गरेको उनको सचिवालयले जनाएको छ ।