दोलखा– सरकारले नयाँ बजेटमा सुन कारोबारमा थप दुई प्रतिशत विलासिता कर र हिरा पत्थरमा १३ प्रतिशत कर तोकेपछि दोलखाका सुन व्यवसायी आन्दोलनमा उत्रिएका छन् ।

जिल्लाभर सञ्चालनमा रहेका करिब चार दर्जन सुनचाँदी पसल बिहीबार बिहानैदेखि बन्द गरिएको नेपाल सुनचाँदी रत्न तथा आभूषण महासंघका सह-कोषाध्यक्ष दीपक धनुकले बताए ।

सुन व्यवसायीले बुधबार जिल्ला प्रशासन कार्यालयलाई कर हटाउनु पर्ने मागसहित ज्ञापनपत्र बुझाएर बिहीबारदेखि दबाब स्वरुप व्यवसाय बन्द गरेको उनको भनाइ छ ।

बिहानैदेखि पसल बन्द गरेर आन्दोलनमा रहेका मैनापोखरीका सुन व्यवसायी चक्र घतानीले राज्यले नेपाली सुन व्यवसायीको मर्म विपरीत छिमेकी राष्ट्र भारतमा हुने अवैध सुन कारोबारलाई प्रोत्साहन गर्न खोजेको बताए ।

छिमेकी देश भारतमा नेपाली बजारको भन्दा ८ हजार सस्तोमा पैठारी सुन कारोबार हुँदा नेपाली बजारमा सुन कारोबार हुन नसकेको समयमा सरकारले प्रष्ट नीति र नियमावली निर्माण गर्नुको साटो विलासिता कर वृद्धि गरेर सुनको कारोबार रोक्न खोजेको बताए ।

व्यवसायीहरूले तत्काल वृद्धि गर्ने भनिएको दुई प्रतिशत विलासिता कर, १३ प्रतिशत हिरा पत्थर कर फिर्ता लिन माग गर्दै सुनचाँदीको कारोबारका लागि सरकारले प्रष्ट नीति र नियमावलीको निर्माण गर्नुपर्ने सुनचाँदी व्यवसायी संघ जिल्ला शाखा दोलखाका अध्यक्ष अनिल रिजालले बताए ।