काठमाडौं– जल तथा मौसम विज्ञान विभाग मौसम पूर्वानुमान महाशाखाले पछिल्लो १–३ घण्टामा डोटीको पश्चिम सेती, दिपायल डोटी र डडेल्धुराको साहुखर्क वर्षामापन केन्द्रहरू र आसपासमा मध्यमदेखि भारी वर्षा भएको जनाएको छ ।

महाशाखाले उक्त क्षेत्र भई बहने ससाना खोलाहरूमा आकस्मिक बाढी समेत आउन सक्ने तथा कमजोर र भिरालो जमिनमा पहिरोको जोखिम रहेकाले दिउँसोसम्मै आवश्यक सतर्कता अपनाउन अपिल गरेको छ ।

यस्तै, महाशाखाले नवलपरासी पश्चिमको देउराली नवल, चितवनको शक्तिखोर र पाल्पाको बलड्याङगढी क्षेत्रका खोला तथा नदीमा आकस्मिक रूपमा बाढी आउने सम्भावना देखिएकाले सतर्कता अपनाउन आग्रह गरेको छ ।

महाशाखाले हाल देशमा पश्चिमी र स्थानीय वायुका साथै कोशी प्रदेशमा मनसुनी वायुको समेत प्रभाव रहेको जनाएको छ ।

महाशाखाका अनुसार २४ घण्टामा १० मिलिमिटरभन्दा कम वर्षा हुनलाई हल्का वर्षा भनिन्छ । यस्तै, १० देखि ५० मिलिमिटरसम्म मध्यम, ५० देखि १०० मिलिमिटरसम्म भारी वर्षा, १०० देखि २०० मिलिमिटरसम्म धेरै भारी वर्षा र २०० मिलिमिटरभन्दा माथिको वर्षालाई अति भारी वर्षाको रुपमा लिने गरिन्छ ।