काठमाडौं – कुनै पनि संरचनाको क्रिकेटमा विश्व च्याम्पियन हुन नसकेको दक्षिण अफ्रिकाले टेस्ट विश्व च्याम्पियनसिपको फाइनलमा खराब सुरुवात गरेको छ।

लर्ड्समा बुधबार सुरु भएको टेस्टको पहिलो दिन १४ विकेट खसेका छन्। अस्ट्रेलियाले पहिलो पारीमा बनाएको २१२ रनको जवाफमा ब्याटिङ गरेको दक्षिण अफ्रिकाले ४३ रनमा ४ विकेट गुमाएको छ।

दोस्रो दिन कप्तान तेम्भा बभुमाले तीन तथा डेबिट बेडिङघमले आठ रनबाट पारी अघि बढाउने छन्।

टस हारेर पहिले ब्याटिङ गरेको अस्ट्रेलियाको पनि सुरुवात खराब थियो। अस्ट्रेलियाले ६७ रनमा चौथो विकेट गुमाएको थियो। स्टेभन स्मिथले ६६ तथा बेउ वेबसेटरले ७२ रन जाडे। दक्षिण अफ्रिकाका कासिगो रबाडाले ५ तथा मार्को जेन्सनले ३ विकेट लिए।

दक्षिण अफ्रिकाको पारीलाई सुरुवातमा नै ध्वस्त पार्ने क्रममा मिचेल स्टार्कले दुई विकेट लिएका छन्।