काठमाडौं – पाकिस्तानको रावलपिण्डी शहरमा आपराधिक घटना ह्वात्तै बढेको पाइएको छ । गत शनिबार मात्रै रावलपिण्डीमा १ सयभन्दा धेरै आपराधिक घटना भएका छन् ।

पाकिस्तानबाट प्रकाशित हुने डन अखबारका अनुसार शहरमा त्यस दिन लुटपाटका मात्रै १७ वटा घटना भएको छ । ती घटनामा परी दुई जनाले ज्यान गुमाएका छन् ।

आपराधिक घटनाका कारण समाजका सबै वर्गका मानिसहरु पीडित भएका छन् । एक जना वृद्ध नगरवासीलाई उद्धृत गर्दै डनले जनाएअनुसार लुटेराले ‘गरिबलाई पनि लुट्ने’ गरेका छन् ।

दिनदहाडै खुला सडकमा लुटपाट, चोरी, शारीरिक हिंसाका घटना हुने गरेको समाचारमा जनाइएको छ । आपराधिक घटना बढ्दै जाँदा रावलपिण्डीका नगरवासी भने त्रसित र असुरक्षित बन्दै गएका छन् ।