काठमाडौं – ‘झोला’ फिल्मका निर्देशक यादकुमार भट्टराईको नयाँ फिल्म ‘झिल्को’को टिजर सार्वजनिक भएको छ । निर्माण पक्षले मंगलबार एक मिनेट १६ सेकेन्डको टिजर सार्वजनिक गरेको हाे ।

टिजरले मोबाइल एडिक्सन अर्थात् मोबाइलको लतले बालबालिकामा पार्ने मानसिक असरमा फिल्म बनेको प्रष्ट हुन्छ । टिजर एक बालिका मोबाइल एडिक्सनमा परेपछि उत्पन्न हुने समस्यामा केन्द्रित छ ।

टिजरमा फिल्मका केन्द्रीय कलाकार सुनील पोखरेल, वर्षा सिवाकोटी, आयुषी ढकाल, विशाललाई देख्न सकिन्छ । फिल्ममा उनीहरुसहित विशाल पोखरेल, भोलाराज सापकोटा, जेभिन श्रेष्ठ र जेभिस श्रेष्ठको अभिनय रहने बताइएको छ ।

निर्देशक भट्टराई सामाजिक विषयवस्तुमा फिल्म बनाउने फिल्मकर्मीका रुपमा चिनिन्छन् । यसअघि उनले फिल्म ‘झोला’मा सती प्रथा र ‘भोर’मा दाइजो प्रथा विरुद्धको कथा उठान गरेका थिए ।

यो पटक भने उनले अहिलेको सान्दर्भिक विषय मोबाइल एडिक्सनको कथा उठान गरेका छन् । यसअघि मोबाइल एडिक्सन मुद्दा उठान गरेर कुनै नेपाली फिल्म बनेका छैनन् ।

प्रविधिको सामाजिक विस्तारीकरण र यसले पार्ने प्रभावबारे ‘झिल्को’ निर्माण भएको निर्देशक भट्टराईको भनाइ छ ।

‘झिल्को’ को कथा र पटकथा निर्देशक भट्टराईले अरुणदेव जोशी र देवव्रतसँग मिलेर तयार पारेका हुन् । मिडिया फर कल्चर प्रालिको प्रस्तुति र जनता टीभीको सहकार्यमा बनेको यो फिल्म आगामी वैशाख १९ गते रिलिज हुँदैछ ।

यसअघि भने यो फिल्मको प्रदर्शन मिति पुस ५ गतेलाई तोकिएको थियो ।

हेर्नुहोस् भिडियो :