काठमाडौं – बार्सिलोना युरोपेली च्याम्पियन्स लिगको क्वार्टरफाइनलमा प्रवेश गरेको छ।

क्वार्टरफाइनल प्रवेश गर्ने क्रममा बार्सिलोनाले मंगलबार राति भएको दोस्रो चरणको दोस्रो लेगमा बेनफिकालाई ३-१ ले हरायो।

पहिलो लेगमा १–० को सफलता पाएको बार्सिलोनाले एग्रिगेटमा ४-१ ले जीत हात पारेको हो।

बार्सिलोनाको घरेलु मैदानमा भएको खेलमा टिनएजर लामिन यमाल नायक भए। उनले ११ औँ मिनेटमा राफिन्हाका लागि गोल गर्ने अवसर दिएका थिए भने २७ औँ मिनेटमा आफैले गोल गरे। राफिन्हाले गोल गरेको दुई मिनेटपछि नै निकोलास ओडेमान्डीले उत्कृष्ट हेड गोल गर्दै बेनफिकालाई खेलमा फर्काएका थिए।

रफिन्हाले नै ४२ औँ मिनेटमा बार्सिलोनाका लागि अर्को गोल गरे। उनी च्याम्पियन्स लिगमा १६ गोलमा आबद्ध भएका छन् । उनले ११ गोल गरेका छन् भने ५ एसिस्ट गरेका छन्।

मेसीले सन् २०११ र १२ को सिजनमा १४ गोल गर्दै ५ एसिस्ट गरेका थिए।