पोखरा – नेपाल पुलिस क्लब पोखरामा जारी २४ औं आहा रारा गोल्डकपको फाइनलमा प्रवेश गरेको छ ।

बुधबार भएको पहिलो सेमिफाइनलमा चर्च ब्वाइज युनाइटेडलाई १–० ले हराउँदै पुलिसले फाइनलमा स्थान पक्का गरेको हो । योसँगै पुलिसले कीर्तिमानी ११ औं पटक आहा राराको फाइनलमा स्थान बनाएको छ।

पोखरा रंगशालामभएको खेलको ५८ औं मिनेटमा सञ्जीव लामाले गरेको गोल नै निर्णायक बन्यो। उनले पेनाल्टी बक्स बाहिरबाट नै गरेको प्रहारलाई चर्च ब्वाइजका गोलकिपरले रोक्ने मौका नै पाएनन्।

पहिलो हाफ बराबरीमा सकिए पनि दोस्रो हाफमा पुलिसले खेल आफ्नो पक्षमा पार्‍यो। चर्च ब्वाइजले पनि केही राम्रा अवसर पाए पनि सदुपयोग गर्न सकेन ।

अब पुलिसले उपाधिका लागि थ्री स्टार र उज्वेकिस्तानको ब्ल्याक बुल्स एफसीबीचको विजेतासँग शनिबार खेल्नेछ।