काठमाडौं- राष्ट्रिय स्वतन्त्र पार्टी (रास्वपा) का सभापति रवि लामिछाने आइतबार बिहान कार्यालय खुल्नुअघि नै जिल्ला अदालत काठमाडौं पुगिसकेका थिए ।

केही सहयोगीसहित स्कोर्पियो चढेर रवि बबरहमहलस्थित जिल्ला अदालत परिसर पुगेका थिए ।

कलंकीस्थित स्वर्णलक्ष्मी सहकारी संस्थाको बचत रकम ठगी अभियोगमा मु्द्दा दर्ता भएपछि उनी बिहबार पोखराबाट छुटेपछि आइतबार काठमाडौं जिल्ला अदालतमा बयानका लागि हाजिर भएका थिए ।

बिहान अदालत परिसरमा झुल्किँदा उनी मुस्कुराउँदै स्कोर्पियोबाट झरे । त्यसपछि उनले इजलासभित्र छिर्नुअघि अदालतको गेटमा समर्थक र पत्रकारलाई हात हल्लाउन भ्याए ।

त्यसपछि जिल्ला न्यायाधीश माधवप्रसाद अधिकारीको इजलासमा उपस्थित भएका उनीसँग बयान थालिएको थियो । आइतबार नै बयान सकिए पनि थुनछेक बहस सुरु हुन सकेन ।

थुनछेक बहस अघि नबढेपछि न्यायाधीश अधिकारीकै आदेशमा उनलाई हिरासतमा पठाइएको हो । हिरासतमा पठाउने आदेशपछि इजलासबाट बाहिरिने क्रममा रवि बिहान जस्तै शैलीमा प्रस्तुत भए ।

अदालतबाहिर जम्मा भएका पत्रकार र समर्थकलाई उनले बिहानकै शैलीमा हात हल्लाउन भ्याए । हिरासतमा जानुअघि उनले आफ्‍ना समर्थकलाई सलाम गर्दै प्रहरीको भ्यानमा चढे ।

प्रहरीले पनि उनलाई भ्यानमा चढाउने क्रममा सलाम गर्न भ्याए । थुनछेक बहस नसकिएपछि लामिछानेलाई अब काठमाडौं प्रहरी परिसरको भद्रकालीस्थित नयाँ हिरासतमा राखिनेछ । काठमाडौं परिसरले नयाँ कार्यालयमा भीआईपी थुनुवाहरूलाई राख्न सुविधायुक्त हिरासत बनाएको छ ।

अब यो मुद्दामा सोमबारदेखि थुनछेक बहस हुने काठमाडौं जिल्ला अदालतले जनाएको छ ।

प्रहरीले कालीमाटीस्थित स्वर्णलक्ष्मी बहुउद्देश्यीय सरकारी संस्थाको रकम अपचलन गरेको आरोपमा लामिछानेसहित ४४ जनाविरुद्ध मुद्दा दर्ता गरेको थियो ।
उक्त सहकारीबाट अपचलन भएको रकमसहित प्रहरीले १ अर्ब १९ करोड ४९ लाख २१ हजार २७० रुपैयाँ बिगो मागदाबी गरिएको छ । लामिछाने पोखराको सूर्यदर्शन सहकारी ठगी मुद्दामा यही बिहीबार ६५ लाख धरौटी बुझाएर रिहा भएका थिए ।