काठमाडौं – लिभरपुल एएफ कप फुटबलको चौथो चरणमा प्रवेश गरेको छ। शनिबार भएको तेस्रो चरणको खेलमा लिभरपुलले एरिङटन स्टान्लेलाई ४-० ले हरायो।

गएराति भएको खेलमा लिभरपुलका लागि डिएगो जोटाले खेलको २९ औं मिनेटमा पहिलो गोल गरे। उसका लागि दोस्रो गोल पहिलो हाफको अन्तिम समय अर्थात् ४५ औं मिनेटमा अलेक्जेन्डर आर्नोल्डले गरे। पहिलो हाफमा २-० ले अग्रता लिएको लिभरपुलले दोस्रो हाफमा थप दुई गोल गरेको हो।

दोस्रो हाफको ७६ मिनेटमा जायडन डान्सले टिमका लागि तेस्रो गोल गरे भने खेलको अन्तिम समय अर्थात् ९० औं मिनेटमा फेड्रिको चियसाले गोल गर्दै चार शून्यको शानदार जित निश्चित गरेका हुन्।

एफए कपका अन्य खेलमा चेल्सीले मोरक्याम्बेलाई ५-० ले हरायो भने नटिङघम फरेस्टले लुओन टाउनसँगको खेलमा २-० को जित निकालेको छ।