भोजपुर- नेपाल कम्युनिष्ट पार्टी (माओवादी केन्द्र) को भोजपुरस्थित रामप्रसादराई गाउँ पार्टी कमिटीले यही कात्तिक १९ गते भएको एकता प्रक्रियाप्रति गम्भीर असहमति जनाएको छ।

गाउँ कमिटीले शुक्रबार वक्तव्य जारी गरेर आफ्नै इतिहास र पहिचान गुमाएर एकतामा नजाने घोषणा गरेको हो ।

‘बदलिएको राजनीतिक परिस्थितिमा आन्तरिक पार्टीलाई रूपान्तरणसहित एकताबद्ध बनाउनु पर्ने थियो’, वक्त्वयमा भनिएको छ, ‘तर जनता र कार्यकर्ताको भावना विपरीत, पार्टी एकताको नाममा आफ्नै विचार, इतिहास र पहिचान गुमाउने निर्णय गरियो, जसले पार्टीको छवि माथि प्रश्न उठाएको छ।’

वक्तव्यमा यस प्रकारको एकता प्रक्रिया पार्टीका सिद्धान्त र आन्दोलनको पहिचानविपरीत भएको भनिएको छ । कमिटीले यस्तो कदमले पार्टीभित्र भ्रम र असन्तुष्टि बढाउने खतरा रहेको चेतावनी दिएको छ।

वक्तव्यमा हस्ताक्षर गर्ने नेताहरूमा अध्यक्ष सुरेशचन्द्र राई, उपाध्यक्ष अमर राई, सचिव सोमकुमार राई, सह–सचिव विनोद मगर र कोषाध्यक्ष रमेश सुनार छन्।

गाउँ पार्टी कमिटीले केन्द्र र प्रदेश नेतृत्वलाई पार्टी एकताको प्रक्रिया पुनःसमीक्षा गर्न र कार्यकर्ताको भावनाअनुसार सुधारको कदम चाल्न आग्रह गरेको छ।

भोजपुर नेता सुदन किरातीको गृहजिल्ला हो । जहाँ उनको बलियो पकड छ । सुदनले एकतामा नगई नेता जनार्दन शर्मासँगै नयाँ अभियान थालेका छन् ।