कोलालम्पुर– मलेसिया–थाइल्यान्ड समुद्री सीमामा  कागजातविहीन आप्रवासी बोकेको डुङ्गा गत हप्ता डुब्दा मृत्यु हुनेको सङ्ख्या १२ पुगेको तथा १३ जनालाई उद्धार गरिएको अधिकारीहरूले मंगलबार बताएका छन् ।

सोमबार केदाह राज्यमा एक बच्चा, दुई पुरुष र दुई महिलासहित पाँच जनाको शव फेला परेको केदाह र पर्लिस राज्यका लागि मलेसियन मेरिटाइम एन्फोर्समेन्ट एजेन्सी (एमएमइए) का निर्देशक रोमली मुस्तफाले विज्ञप्ति मार्फत बताएका छन् । 

खराब मौसमका कारण स्थगित गरिएको खोजी कार्य ममंलबार देखि पुनः सुरु गरिएको उनले बताए ।  

यस वर्ष मात्रै केदाह राज्यको प्रमुख पर्यटकीय गन्तव्य लाङ्गकावी वरपर ४३६ आप्रवासीहरू पक्राउ भएको जनाउँदै उनीहरू यहाँ बस्नका लागि नभई देशका अन्य भागमा जानका लागि आएको बताए ।  

यसैबीच, एमएमइएले सन् २०२० देखि सोही क्षेत्र हुँदै देशमा प्रवेश गर्न खोज्ने करिब एक हजार ३३३ अवैध आप्रवासीलाई रोकिसकेको बताएको छ । 

सोही अवधिमा २४ जना क्याप्टेन र चालक दलका सदस्यहरूलाई समेत नियन्त्रणमा लिई हिरासतमा लिइएको जनाइएको छ । रासस