काठमाडौं– मधेश प्रदेशका नवनियुक्त मुख्यमन्त्री सरोजकुमार यादवले आफ्नो नियुक्तिविरुद्ध सर्वोच्च अदालतले फैसला गरेमा तत्काल पद छाड्ने बताएका छन् ।

मंगलबार जनकपुरधाममा आयोजित पत्रकार सम्मेलनमा मुख्यमन्त्री यादवले आफ्नो नियुक्ति असंवैधानिक वा गलत ठहराएमा एक छिन पनि पदमा नबस्ने बताएका हुन् ।

संवैधानिक सर्वोच्चता कायम गर्न बाध्यात्मक अवस्थामा सबैभन्दा ठूलो दल एमालेको नेताको हैसियतले मुख्यमन्त्री बनेको उल्लेख गर्दै यादवले दलहरूले सहयोग गर्नेमा विश्वस्त रहेको धारणा राखे ।

विगतमा सरकार बन्दा एमालेले अन्य दललाई मुख्य रूपमा सहयोग गरेको हैसियतमा अव आफूलाई अन्य दलले आफूलाई विश्वासको मत दिने उनले बताए ।

मुख्यमन्त्री यादवले अघिल्लो दिन आफूले नियुक्तिको पत्र पाइसकेपछि शपथ ग्रहण गराएर मात्रै काठमाडौं जान प्रदेश प्रमुखलाई भनेको स्पष्ट पारे  । त्यसैका कारण आफ्नो शपथ बिहानै होटलमा आयोजना गरिएको उनको भनाइ छ । उनले प्रदेश प्रमुख पदमुक्त गरिएकोमा असन्तुष्टि व्यक्त गरे ।