काठमाडौं- ‘जेनजी अलायन्स फर मोनार्की’ नामक गरेको एउटा जेनजी समूहले विद्रोहमा जाने चेतावनी दिएको छ । उक्त समूहले शनिबार विज्ञप्ति जारी गरी आफूहरु नै असली जेनजी भएको भन्दै वर्तमान सरकार र राजनीतिक नेतृत्वले वास्तविक देशभक्त र राष्ट्रवादी जेनजीहरूलाई निषेध गरेको आरोप लगाएको छ ।

उक्त समूहले प्रधानमन्त्री र राष्ट्रपतिसँग छलफलका लागि बोलाइएका प्रतिनिधिहरू दलसँग आबद्ध विद्यार्थी सङ्गठनको टिकट लिएर चुनाव लडेका वा नेपालको हित विपरीत चलेका विदेशी आईएनजीओको सदस्य मात्र रहेको दाबी पनि गरेको छ ।

‘‘हामी वास्तविक जेन जी समूहका देशभक्त राष्ट्रवादी किशोर किशोरी तथा युवाहरु तपाईंहरुको एकलकाँटे र निषेधको विचार तथा व्यवहार देखेर आजित एवम् शान्तपूर्वक आक्रोशित पनि भएका छौं, हामीलाई फेरि साँच्चै विद्रोहमा जान तपाईंहरुले बाध्य पारिरहनु भएको अवस्था जानकारी दिन चाहन्छौ ।’’ उक्त समूहले भनेको छ ।

‘‘हाल राष्ट्रपति र प्रधानमन्त्रीले जेनजी भनी एकपक्षीय वार्ता र संवाद गरिरहेकोमा त्यस षडयन्त्रलाई तत्काल रोकियोस् र सर्वपक्षीय सहमतिको बाटो खोजियोस् भनी अपिल गर्दछौं । नत्र भविष्यमा यसै कारणबाट पर्न जाने क्षतिको जिम्मेवारी सो प्रक्रियामा रहेका राष्ट्रपति, प्रधानमन्त्री, मन्त्रीहरु, दलहरु र सञ्चारमाध्यम तथा समाजका बुद्धिजिवीहरुले पनि लिनु पर्ने समेत संयमतापूर्वक चेतावनी सहित जानकारी दिन चाहन्छौं ।’’ उक्त समूहले भनेको छ । उक्त समूहले राष्ट्रपति र प्रधानमन्त्रीले जेनजीका नाममा राजनीतिक दलका कार्यकर्ता र विदेशी एजेन्टसँग छलफल गरिरहेको आरोप लगाएको छ ।

तर, आन्दोलनमा शहादत प्राप्त गर्ने शहीद र घाइते योद्धाहरू चाहिँ कुनै पनि भ्रष्ट नेता र दलसँग आबद्ध नभएको र विदेशी एजेन्ट आईएनजीओको सदस्य नभएको सो समूहको भनाइ छ । यसबाट लड्नेहरू सच्चा देशभक्त रहेको र मौकाको फाइदा उठाउनेहरू पुरानै भ्रष्टताको पक्षमा रहेको स्पष्ट हुने उनीहरूले दाबी गरेका छन् ।