काठमाडौँ- अन्तरिम सरकारको प्रधानमन्त्रीमा प्रस्तावित पूर्वप्रधानन्यायाधीश सुशीला कार्की र राष्ट्रपति रामचन्द्र पौडेलबीच अहिले भेटवार्ता हुँदै छ ।

यो भेटवार्ताबारेको पुष्टि काठमाडौँ महानगरपालिकाका मेयर बालेन्द्र साहले आफ्नो सचिवालयका सदस्यहरूलाई गराएका छन्।

सुशीलाले पनि आफूलाई प्रधानमन्त्रीमा समर्थन गरेका बालेनलाई पनि यसबारे जानकारी गराएको स्रोतले जनाएको छ । राष्ट्रपति पौडेल अहिले महाराजगञ्जमै छन् । दुईजनाबीच त्यहीँ भेटवार्ता हुने तयारी भएको हो ।

यता जेन-जी युवाहरूको समूहले अन्तरिम सरकारको प्रधानमन्त्रीमा सुशीलालाई आजै राति ११ बजेभित्र नियुक्त गरिसक्न पनि अल्टिमेटम दिएका छन् ।

बिहीबार बिहान नेपाली कांग्रेस र नेकपा एमालेका नेताहरूले वक्त्व्य निकालेसँगै ती दलका कार्यकर्ताहरू विभिन्न स्थानमा सडकमा उत्रिए ।

नाराबाजीसहित उनीहरू उत्रिन थालेपछि सुरक्षाको कमान्ड सम्हालेको सेना दबाबमा परेको थियो । अर्कातिर जेन-जी युवाहरू विभिन्न व्यक्तिको पक्षमा विभाजित भएर जंगीअड्डाकै सामुन्ने दिभर हल्ला र कुटाकुटसमेत गरे ।

एकातिर दलका कार्यकर्ताको सडकमा प्रदर्शन र अर्कातिर जेन-जीबीचको तनावले दबाबमा परेको सेनाले बाहिरका जिल्लाबाट पनि फोर्स झिकाएको छ । रात्रि गस्तीका लागि समेत सेनाले आवश्यक बन्दोवस्तीसहितका सेना उपत्यकामा उतारेको हो ।