काठमाडौं– विभिन्न राजनीतिक दलका विद्यार्थी संगठनहरूको नेतृत्व गरिसकेका नेताहरूले वृहत् राजनीतिक संवाद र सहमतिमार्फत् मात्रै देशलाई अग्रगामी दिशामा लैजान सकिने निष्कर्ष निकालेका छन् । 

उनीहरूले बिहीबार संयुक्त विज्ञप्ति जारी गरेर पछिल्लो राजनीतिक घटनापछि मुलुकलाई अग्रगामी दिशामा लैजाने उपाय वृहत् राजनीतिक संवाद र सहमतिमात्रै हुन सक्ने निष्कर्ष सार्वजनिक गरेका हुन् । 

‘देशलाई अग्रगामी दिशामा लैजान, आन्दोलनरत युवा, विद्यार्थीहरू तथा आम जनताका मागको सम्बोधन, जनचाहनाअनुरूप संविधान संशोधनलगायतका कार्यहरू वृहत् राजनीतिक संवाद र सहमतिमार्फत् मात्रै हुन सक्ने विषय भएको ठहर गरेका छौँ,’ उनीहरूले भनेका छन् । 

विद्यार्थी संगठनहरूका पूर्व अध्यक्षहरूले संसद् विघटन, राष्ट्रपतिको राजीनामा, स्वतन्त्र व्यक्तिको नेतृत्वमा सरकार गठनजस्ता प्रतिगामी मागविरुद्धमा सडक संघर्षमा उत्रिनका लागि तयार रहन युवा र विद्याथीहरूलाई अपिल पनि गरेका छन् । 

जेन–जी आन्दोलनका क्रममा गोली हानेर हत्या गरिएका विद्यार्थीप्रति श्रद्धाञ्जली अर्पण गर्दै उनीहरूले परिवारजनप्रति समवेदना व्यक्त गरेका छन् । उनीहरूले मृतकका परिवारलाई क्षतिपूर्ति दिन पनि माग गरेका छन् । 

‘उक्त हत्याकाण्डमा संलग्न व्यक्तिहरू र भदौ २४ गते राष्ट्रको सम्पत्ति जलाउने, जनधनको क्षति पुर्‍याउने, लुटपाट गर्ने सम्पूर्ण व्यक्तिहरूलाई कारबाही गर्न शक्तिशाली स्वतन्त्र र निष्पक्ष न्यायिक आयोग गठन गरी कारबाही प्रक्रिया अगाडि बढाउन माग गर्दछौँ,’ विज्ञप्तिमा भनिएको छ ।