वासिङ्टन– अमेरिकी राष्ट्रपति डोनाल्ड ट्रम्पले घरबारविहीनहरूले राजधानी सहर वासिङ्टन डिसी छाड्नु पर्ने बताएका छन् ।

वासिङनका मेयरले भने ट्रम्पले राखेको यस विषयमा सहमति जनाएका छैनन् । ट्रम्पले उनीहरूलाई राजधानी भन्दा पर कतै बसोबासको व्यवस्था मिलाइदिने बताएका छन् ।

सोमबार राष्ट्रपति ट्रम्पले राजधानी सहरलाई कसरी सफा र सुरक्षित राख्ने भन्ने विषयमा छलफल गर्ने छन् । मेयर मायुरी बोजरले भने घरबार विहीनहरू अपराधमा संलग्न नरहेको बताए ।

वासिङ्टनको सडक सफा बनाउन राष्ट्रपति ट्रम्पले एक निर्णयमा हस्ताक्षर गरेका थिए । उक्त निर्णयमा सडक छेउमा रहेका पाल हटाउन सकिने विषय उल्लेख थियो ।

‘होमलेसहरुले तत्काल सहर छाड्नु पर्छ,’ ट्रम्पले आइतबार सामाजिक सञ्जालमा लेखेका थिए । उनले आपराधिक गतिविधिमा संलग्न हुने हरूलाई जेल चलान गर्ने समेत बताएका छन् ।

शुक्रवार मात्रै ट्रम्पले य्एस पार्क पुलिस, द ड्रग इन्फोर्समेन्ट एडमिनिस्ट्रेसन, एफबिआई र युएस मार्सल सर्भिसका अधिकारीसँग बैठक गर्दै राजधानी सहरमा अपराध बढ्दै गएको कुरा उल्लेख गरेका थिए ।