काठमाडौं– प्यालेस्टाइनको पक्षमा अमेरिकी विद्यार्थी आन्दोलनको नेतृत्व गर्ने विद्यार्थी नेता महमूद खलीलले अध्यागमन अधिकारीहरूले गरेको गिरफ्तारी र थुनामा राखेकोमा अमेरिकी राष्ट्रपति डोनाल्ड ट्रम्पको पूर्वप्रशासन विरुद्ध २० मिलियन डलरको मुद्दा दायर गरेका छन् ।

एएफपी समाचार एजेन्सीका अनुसार संवैधानिक अधिकार केन्द्रले महमूद खलीललाई कानुनी सहयोग प्रदान गरिरहेको छ । मुद्दामा ट्रम्प प्रशासनले महमूद खलीललाई डर देखाउन गैरकानूनी योजनामा पक्राउ गर्ने, हिरासतमा राख्ने र देश निकाला गर्ने प्रयास गरेको उल्लेख छ ।

निवेदनमा घटनाका कारण खलीलले गम्भीर मानसिक आघात, आर्थिक क्षति र प्रतिष्ठामा क्षति पु¥याएको उल्लेख गरिएको छ । महमूद खलीलले यो मुद्दालाई जवाफदेहितातर्फको पहिलो कदमको रूपमा वर्णन गरेका छन् ।

उनले आफ्नो बयानमा भनेका छन्, ‘मेरो जीवनका ती १०४ दिन कहिल्यै फर्केर आउन सक्दैनन्, मैले भोग्नु परेको आघात, मेरी श्रीमतीबाट बिछोड र मेरो पहिलो सन्तानको जन्मको क्षण जसको म हिस्सा बन्न सकिनँ, ती सबै अपूरणीय छन् ।’

उनले राजनीतिक प्रतिशोध र शक्तिको दुरुपयोगको जवाफदेहिता हुनुपर्ने बताए ।

महमूद खलीलले पहिले नजरबन्दको समयमा आफूले भोगेका पीडादायी अवस्थाहरूको बारेमा बोलेका छन्, उनले भनेका छन्, ‘म ७० जनाभन्दा बढी मानिसहरू भएको साँघुरो ठाउँमा बसिरहेको थिएँ, जहाँ कुनै गोपनियता थिएन, र बत्तीहरू कहिल्यै निभ्दैनथे ।’