काठमाडौं- काठमाडौं महानगरपालिकाको ४० औँ नगरकार्यपालिका बैठक शुक्रबार नै बस्ने भएको छ ।

स्रोत अनुमान तथा बजेट सीमा निर्धारण समितिको बैठकले आगामी आर्थिक वर्षका लागि २५ अर्ब ११ करोड ३४ लाख रुपैयाँ बराबरको बजेटको आकार निर्धारण गरेपछि नगरकार्यपालिका बैठक बस्न लागेको हो ।

शुक्रबार मेयर बालेन्द्र साहको कार्यकक्षमा समितिका सदस्य सचिव एवम् प्रमुख प्रशासकीय अधिकृत सरोज गुरागाईंसहितको बैठकले बजेटको आकार तय गरिसकेको छ । यो अवस्थामा यही असार ३२ गतेसम्म बजेट ल्याउने गरि नगरसभाको मिति तोक्न कार्यपालिका बैठक बस्न लागेको हो ।

कार्यापालिका बैठक पनि गत २०८१ पुस पहिलो सातादेखि बस्न सकेको छैन । हरेक महिनाजसो बस्नुपर्ने कतिपय बैठक पनि काठमाडौंमा बस्न नसकेको अवस्थामा आर्थिक वर्षको अन्तिममा बजेट आउने भएको हो ।

असारमा ३२ को महिना छ । शनिबारबाहेक अबको चार दिनभित्र बजेट ल्याउनुपर्ने बाध्यतामा काठमाडौं महानगर छ । अन्य पाँचवटा महानगरले यसअघि नै बजेट ल्याइसकेका छन् ।

यस्तोमा शुक्रवार बस्ने ४० औँ नगरकार्यपालिका बैठकले नगर सभाको मिति तय गरी त्यही नगर सभामार्फत् बजेट सार्वजनिक गर्ने छ । महानगरको बजेट यसअघि नै तय भइसकेको थियो ।

अब उक्त नगरसभामा उपमेयर सुनिता डंगोलले बजेट सार्वजनिक गर्नेछिन् । स्थानीय तहले असार १० गतेभित्र बजेट ल्याउनुपर्ने हुन्छ । तर प्रमुख प्रशाकीय अधिकृत गुरागाईंलाई नस्वीकार्ने बालेनको अडानले आर्थिक वर्ष सकिने बेला पनि अन्योल थियो ।