काठमाडौं- ज्ञानेन्द्र शाहलाई राजाकै हैसियतमा ‘श्री ५’ भनेर सम्बोधन गरेपछि संवाद सचिव फणिन्द्रप्रसाद पाठकलाई प्रहरीले बोलाएको छ ।

जिल्ला प्रहरी परिसर काठमाडौंका प्रवक्ता एवम् एसपी अपीलराज बोहोराले ज्ञानेन्द्रलाई त्यसरी गरिएको सम्बोधनको कानुनी हैसियतबारे सोध्न उनलाई झिकाइएको बताए ।

‘पक्राउ गरिएको होइन, पूर्वराजालाई ‘श्री ५’ र राजाकै रुपमा सम्बोधन गरेको विषयमा कानुनी हैसियत र मान्यताबारे जानकारी लिन झिकाएका हौँ’, उनले भने, ‘नेपालको संविधानले ज्ञानेन्द्र शाहलाई राजाको हैसियत दिएको छैन र त्यसरी चिन्दा पनि चिन्दैन । त्यहीकारण उहाँसँग सोधपुछका लागि बोलाएका हौँ।’

संवाद सचिव पाठकलाई प्रहरीले शुक्रबार बिहान नियन्त्रणमा लिएको हो । पूर्वसचिव पाठकले पूर्वराजाबारे विज्ञप्ति निकाल्दा श्री ५ महाराज धिराज ज्ञानेन्द्र वीरविक्रम शाह लेखेकोबारेमा सोधपुछका लागि नियन्त्रणमा लिइएको हो ।

पूर्वराजा लेख्नुपर्ने ठाउँमा वर्तमान र बहालवाला राजाकै हैसियतमा विज्ञप्ति निकाल्नु संविधानविपरीत भएको भन्दै प्रहरीले उनलाई नियन्त्रमा लिएको हो ।

यसैबीच ‘श्री ५ ज्ञानेन्द्र’ लेखिएको बहानामा पाठकलाई सोधपुछको निमित्त सरकारले बोलाउनु आश्चर्यजनक र हास्यास्पद रहेको राप्रपा नेपालका अध्यक्ष कमल थापाले बताएका छन् ।

‘यो सरकारको संकिर्ण मानसिकताको द्योतक हो। ‘श्री ५ ज्ञानेन्द्र’ नेपालका ‘राजा’ हुन्, प्राविधिक रूपमा अहिले राजतन्त्र नरहे पनि वा संविधानले नचिने पनि उनीभन्दा पछि अरू कोही राजा नभएकाले उनलाई ‘श्री ५ ले’ सम्बोधन गर्नु स्वभाविक र मर्यादा पनि हो’, थापाले भनेका छन् ।