रूपन्देही– नेपाल पत्रकार महासङ्घका निवर्तमान अध्यक्ष विपुल पोखरेलले साइबर कानुनको आडमा पत्रकारिता क्षेत्रलाई तर्साउन खोज्नु आपत्तिजनक भएको बताएका छन् । 

नेपाल प्रेस युनियन रूपन्देहीले बुटवलमा आयोजना गरेको विकास पत्रकारिता तालिमको उद्‌घाटन समारोहमा उनले असम्बन्धित कानुनको आडमा पत्रकारिता क्षेत्रलाई तर्साउन खोज्नु खेदजनक बताए ।

‘सञ्चार माध्यममा आएका सामग्रीमाथि चित्त नबुझे प्रेस काउन्सिलले हेर्ने हो, प्रहरीले हैन,’ निवर्तमान अध्यक्ष पोखरेलले भने, ‘साइबर कानुन पत्रकारितासँग सम्बन्धित कानुन हैन । असम्बन्धित कानुनको आडमा पत्रकारिता क्षेत्रलाई तर्साउन खोज्नु खेदजनक ।’

सबै मुद्दाहरू सिधै अदालत प्रवेश नगर्ने भन्दै उनले अर्धन्यायिक र नियामक निकायको भूमिकाको सम्मान हुनुपर्नेमा जोड दिए ।

 ‘अदालत प्रक्रियाका नाममा प्राविधिक नबनोस्,’ पोखरेलले भने, ‘न्यायको संरक्षणका साथ थिति बसाल्न योगदान दिन सक्ने बनोस् ।’ 

उनले लोकतन्त्र र संविधानको रक्षाका लागि नेपाली प्रेस अझ शसक्त भएर उभिन आवश्यक भएको पनि बताए ।

 ‘सबै राज्य संरचनालाई कमजोर र बदनाम गर्दै व्यवस्था कमजोर बनाइँदै छ,’ पोखरेलले भने, ‘लोकतन्त्र र संविधानको रक्षाका लागि नेपाली प्रेस अझ शसक्त भएर उभिन आवश्यक भएको छ ।’