काठमाडौं– प्रतिनिधिसभामा देखिएको अवरोध खुलाउन सभामुख देवराज घिमिरे दलहरूका प्रमुख सचेतकसँग छलफलमा जुटेका छन् । 

प्रतिपक्षमा रहेका दलहरूको अवरोधका कारण संसद् बैठक सुचारु हुन नसकेपछि उनी बुधबार पनि प्रमुख सचेतकहरूसँग छलफलमा जुटेका हुन् । 

प्रतिपक्षी दलहरू भिजिट भिसा प्रकरणमा मुछिएका गृहमन्त्री रमेश लेखकको राजीनामा र छानबिनका लागि समिति गठनको माग गर्दै आएका छन् । 

प्रतिपक्षी दलहरूको मागअनुसार भिजिट भिसा प्रकरणको छानबिन गर्न सरकार तयार देखिँदैन । भिजिट भिसा प्रकरणलाई कांग्रेस–एमालेले सामान्य रुपमा लिएर गृहमन्त्री लेखकको बचाउ गरिहरेका प्रतिपक्षको आरोप छ ।

जेठ १५ गते संसद्मा बजेट प्रस्तुत भएपछि सभामुख घिमिरेले अर्को बैठक जेठ २० गतेका लागि बोलाएका थिए । प्रतिपक्षी दलहरूको अवरोधका कारण जेठ २० देखि २६ गतेसम्म संसद् बैठक लगातार छ दिन अवरुद्ध भइसकेको छ । सभामुख घिमिरेले बुधबारका लागि फेरि बैठक बोलाएका छन् ।

यसअघि प्रचण्ड नेतृत्वको पूर्ववर्ती सरकारका बेला तत्कालीन प्रमुख प्रतिपक्षी कांग्रेसले सहकारी ठगी प्रकरणको छानबिनका लागि संसदीय समिति गठन गर्नुपर्ने माग राख्दै दुई महिनाको अवधिमा २२ वटा संसद् बैठक अवरोध गरेको थियो ।