काठमाडौं– राष्ट्रिय प्रजातन्त्र पार्टी नेपालका अध्यक्ष कमल थापा राष्ट्रिय प्रजातन्त्र पार्टीका अध्यक्ष राजेन्द्र लिङ्देनलाई भेट्न पुगेका छन् । थापाले ३७ महिनापछि पार्टी कार्यालय धुम्बाराही पुगेर अध्यक्ष लिङ्देनसँग भेट गरेका हुन् ।

‘३७ महिनापछि पार्टी कार्यालय आएर अध्यक्ष लिङदेनलाई भेट्नुभयो । कमल थापाले आफैँ म ३७ महिना भएछ धुम्बाराई नआएको भन्नुभयो । त्यसपछि दुवैजना नेताहरू हाँस्नुभएको थियो ।’ राप्रपाका नेताले भने, ‘दुवैजना एकदम खुशी मुद्रामा हुनुहुन्थ्यो । उहाँहरूबीच पछिल्लो राजनीतिक आन्दोलनको विषयमा कुराकानी भएको छ।’

पछिल्लो समय राजावादी आन्दोलन एकीकृत गर्नका लागि दुई नेता मिलेको बुझिएको छ । राजतन्त्र फर्काउने आन्दोलनको विषयमा छलफल गर्न र नयाँ एजेन्डा तयार गर्न दुई नेताहरूबीच भेटघाट भएको बताइएको छ ।