काठमाडौं– प्रधानमन्त्री केपी शर्मा ओलीले आफूलाई ४ वर्ष अनावश्यक थुनामा राखेको बताएका छन् । सरकारले प्रस्तुत गरेको नीति तथा कार्यक्रममा उठाएको प्रश्नको जवाफ दिँदै उनले १० वर्षमा मुद्दा सकिएको भएपनि थप ४ वर्ष अनावश्यक थुनेको बताएका हुन् ।

‘१० वर्षमा मुद्दा सकियो तर थप ४ वर्ष फ्रिमा थुनिदियो, थुनिने म आफैँ साक्षी रहेको छु,’ उनले भने । उनले गत १५ चैतमा भएको राजावादी आन्दोलनको नेतृत्व र त्यसको जिम्मेवारी लिन कोही अघि नआएको पनि उनले बताए ।

‘चैत १५ गतेको आन्दोलनको नेतृत्व बेवारिस भएको छ, तपाईँ हो नेतृत्वकर्ता हो भन्दा होइन, अहिले म होइन, म होइन भन्छन्,’ उनले भने, ‘के दिक्क लाग्यो भनेर जडिबुटीले आफैँ आगो लगाएर आत्महत्या गरेको हो ?’

उनले केही दिनअघि राजावादीको भेलामा ‘राजासँग नमिले भाग्ने दिन आउँछ’ भन्ने भनाइप्रति पनि टिप्पणी गरेका छन् । ‘जनताले यसअघि नै फालेको प्रतिगामीहरूलाई ल्याउनका लागि राजासँग नमिले भाग्नु पर्छ भन्ने अभिव्यक्ति सुनेँ, म त पाको भएँ, कहाँ भाग्न सक्छु र ? नेपाली जनतालाई ललकार्ने नेपाली जनता भाग्दैन, भाग्दै भाग्दैन । हामी पाका मान्छे कहाँ भाग्ने ? भाग्न त तपाईँ युवाहरु सक्नुहुन्छ, हामी बुढापाका भाग्न सक्दैनौँ, हामी भाग्दैनौँ ।’