काठमाडौं – भारतीय रक्षामन्त्री राजनाथ सिंहले सन् २०३० सम्म आफ्नो मुलुकमा प्रविधि क्षेत्रको बजार ३ खर्ब ५० अर्ब डलर बराबर पुग्ने दाबी गरेका छन् । नवप्रवर्तन, डिजिटल परिवर्तन र सरकारी पहलका कारण सन् २०३० सम्म भारतमा प्रविधि क्षेत्रको बजार ३ अर्ब ५० अर्ब डलर बराबर पुग्ने मन्त्री सिंहको भनाइ छ ।

आईआईटी भारतीय प्रविधि प्रतिष्ठान आईआईटी मन्डीमा आयोजित एक कार्यक्रमलाई सम्बोधन गर्दै मन्त्री सिंहले भारतमा प्रविधि क्षेत्रको विकास तीव्र गतिमा भइरहेको उल्लेख गरे । मन्त्री सिंहले प्रविधि क्षेत्र भारतको अर्थतन्त्र मात्रै नभइ राष्ट्रिय सुरक्षाका लागि पनि महत्वपूर्ण भएको बताए ।

पछिल्लो समय स्टार्टअप कम्पनीको बढ्दो उपस्थिती, प्रविधि क्षेत्रप्रति वैदेशिक लगानीको आकर्षण र सरकारी पहलका कारण भारतमा प्रविधि उद्योगको विस्तार भइरहेको छ । पछिल्लो समय भारतमा साइबर सुरक्षा, आर्टिफिसियल इन्टिलिजेन्स, फाइभजी, सेमिकण्डक्टर उत्पादनजस्ता क्षेत्रमा लगानी बढिरहेको देखिन्छ ।