काठमाडौं – असोजमा प्रदर्शनमा आएको फिल्म ‘१२ गाउँ’ सुपरहिट बन्यो । यसका नायक र निर्देशक विराज भट्ट हुन् ।

होम प्रोडक्सनको सुपरहिट फिल्म दिएकाले लामो समयपछि नेपाली सिनेमा क्षेत्रमा विराजको उपस्थिति स्मरण हुने गरी देखिएको छ ।

उनले अब कुन फिल्म गर्लान् ? भन्नेमा आम दर्शकको चासो छ । यता विराज भने ‘१२ गाउँ’को सिक्वेल ल्याउने तयारीमा थिए ।

तर, अहिले ‘१२ गाउँ’ सिक्वेलको निर्माणको कामलाई विराजले विश्राम दिएका छन् । उनी बाहिरी ब्यानरको फिल्म ‘राम नाम सत्य’मा अनुबन्ध भएका छन् ।

विराज र ‘राम नाम सत्य’का निर्देशक माइकल चन्दबीच कागजी सम्झौता भइसकेको छ ।

‘राम नाम सत्य’का कथा वस्तु रोचक लागेकाले होम प्रोडक्सनको फिल्मलाई केही समय रोकेको विराजले बताए । यो फिल्म सकिएपछि विराज सिक्वेलको काममा लाग्ने बुझिएको छ ।

फिल्मका लेखक समेत रहेका निर्देशक चन्दका अनुसार अन्य कलाकार चयनको काम भने बाँकी छ । सम्झौता भएका कलाकारहरु सार्वजनिक गर्दै जाने तयारीमा उनी छन् ।

यस फिल्मको छायाङ्कन भने आगामी नयाँ वर्षको सुरुवातबाट हुने बताइएको छ । विशेष योजना रहेकाले फिल्मको प्रि-पोडक्सनमा केही समय बढी लाग्ने चन्दले बताए ।

यस फिल्ममा एक्सन, लभ स्टोरी र कमेडीको मिश्रण हुने निर्देशक चन्दले बताए । फिल्मका निर्माताहरु उत्तम गुरुङ, उपेन्द्र शाही र स्वेता विमली हुन् ।