काठमाडौं–प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डले पूर्वराजा ज्ञानेन्द्र शाहलाई लोकतन्त्रभित्रै अधिकार खोज्न आग्रह गरेका छन् ।

मंगलबार प्रतिनिधि सभामाको बैठकमा विपक्षी दलको नेताको हैसियतमा बोल्दै उनले भने, ‘लोकतन्त्र जति प्रचण्डको हो, त्यति नै ज्ञानेन्द्र शाहको पनि हो ।’

उनले पूर्वराजा शाहलाई सम्झाउने क्रममा राजसंस्था पुनर्स्थापनाको गलत बाटोमा नजान पनि भने ।

‘लोकतन्त्र जति प्रचण्डको हो, त्यति नै ज्ञानेन्द्र शाहको पनि हो भन्ने मान्यता सबै राजनीतिक दलले राखेका छौँ । यो कुरालाई कमजोरी नठानियोस्,’ उनले भने, ‘संविधानले पनि मान्यता दिएको छ । लोकतन्त्रका मूल्य मान्यता नमानेर असंवैधानिक बाटो रोजिए क्रान्तिले आफ्नो शक्ति देखाउँछ । यो चुनौतीसहित पूर्वराजाले लोकतन्त्रभित्रै ठाउँ खोजेमा हामीलाई आपत्ति छैन ।’

सरकारले आफ्ना कार्यशैली नसुधारे सडकमा प्रतिक्रियवादीहरू अझै सलबलाउने उनले बताए । जनतामा सरकारप्रति वितृष्णा बढेकाले जनचाहानालाई उपेक्षा गर्न नहुने बताए ।