काठमाडौं– प्रमुख सत्तारूढ नेकपा एमालेले संग्रहालयमा थन्किसकेको राजतन्त्र फर्किने सपना नदेख्न चेतावनी दिएको छ ।

मंगलबार बसेको प्रतिनिधि सभाको बैठकमा एमालेले पूर्वराजा ज्ञानेन्द्र शाहको विषय उठाउँदै यसो भनेको हो । बैठकमा बोल्दै नेकपा एमालेका प्रमुख सचेतक महेश बर्तौलाले संग्रहालयमा थन्किएको राजतन्त्र फर्कन्छ भन्ने सपना नदेख्न आग्रह गरे ।

बर्तौलाले संविधानको धारा १ मा र २ विरुद्ध पूर्वराजा ज्ञानेन्द्र शाह निस्किएको भन्दै उनलाई सचेतसमेत गराए ।

‘पूर्व राजाको उक्साहटबाट अराजक गतिविधि भइरहेका छन् । यो सबै काम पूर्व राजाले गर्ने उक्साएका छन्’, उनले भने, ‘भारतीय जनता पार्टी र उत्तर प्रदेशका मुख्यमन्त्रीको फोटोसमेत देखियो । यो संविधानविरोधी काम हो । यसबारे म सदनको ध्यानाकर्षण गराउँछु ।’

बर्तौलाले राजाको शासनका बेला बज्ने राष्ट्रगान गाएर नेपालको राष्ट्रगानमाथि गम्भीर प्रहार गरिएकोसमेत दाबी गरे ।

‘लोकतन्त्रको विकल्प राजतन्त्र हुन सक्दैन । लोकतन्त्रको विकल्प निरकुश तन्त्र हुँदैन,’ उनले भने, ‘संग्रहालयमा थन्किएको राजतन्त्रले फेरि पनि हुकुम प्रमाङ्गीका माध्यमबाट देश चलाउँछु भन्ने सपना देख्ने र देख्न लगाउने ?’