काठमाडौं– राष्ट्रिय प्रजातन्त्र पार्टी (राप्रपा)का सांसद ज्ञानबहादुर शाहीले देश कसैको बालहठमा नचल्ने बताएका छन् । प्रतिनिधिसभाको मंगलबारको बैठकमा उनले देश विधिको शासनबाट चल्ने बताए । 

‘यो देश विधिको शासनले चल्छ, कसैको बालहठले चल्दैन । राष्ट्रसेवक प्रहरी यो संसदमा मर्यादापालकका रूपमा हुनुहुन्छ,’ प्रहरीमाथि कुटपिट गर्ने नेकपा एमालेनिकट विद्यार्थी नेतालाई उन्मुक्ति दिएको प्रति आपत्ति जनाउँदै शाहीले भने, ‘आज मन्त्रीले सुन्नुपर्ने कुरा हो । आज यो देशमा ७९ हजार पाँच सय ४१ जना प्रहरी छन् । आज ती प्रहरीको शिर निहुराउने काम यो सरकारले गरेको छ ।’ 

सांसद शाहीले प्रहरी कर्मचारीमाथि कुटपिट गर्ने एमालेनिकट विद्यार्थीहरू माथि कारबाही हुनुपर्ने पनि बताए । ‘के नेपाल प्रहरीको बर्दी लगाएका मान्छेलाई जाँड खाएर बाटोबाटोमा कुट्दै गर्ने ओली सरकारले छुट दिएको हो ? यदि हो भने पछि तपाईंहरू एउटा संविधान बनाउनुस्,’ उनले भने, ‘यस्तो गर्न पाइन्छ ? विधिको शासन छैन ? आज गरिबका छोराछोरीले खाने जागिर बनेको छ नेपाल प्रहरी । आज सर्वहाराको छोराछोरीले खाने बनेको छ । उनीहरूमाथि कुटपिट गर्न पाइन्छ ? तत्काल कारबाही गरियोस् ।’

एमालेकी लुम्बिनी प्रदेश सांसद रेखा शर्मालाई सरकारले उन्मुक्ति, दिएको भन्दै सांसद शाहीले आपत्ति जनाए । 

‘१४ वर्षीया बालिकालाई घरेलु मजदुरका रूपमा ६ वर्षसम्म बन्धक बनाइ शारीरिक यातना दिएर एमालेकी लुम्बिनी प्रदेश सांसद रेखा शर्मा सत्ताको निगाहमा उन्मुक्ति पाउनुहुन्छ,’ उनले भने, ‘म अनुरोध गर्न चाहन्छु । अब दुई वटा कानुन बनाउनुस् । एउटा ओली सरकारको ट्याग लाग्यो भने बलात्कार गरे पनि यो देशमा खुल्लम् खुल्ला हिँड्न पाउँछ । एउटा नेपालको कानुन बनाऔँ– जो सर्वसाधारण जनतालाई लगेर थुन्न पाइन्छ । बोलेकै आधारमा कुट्न पाइन्छ ।’