काठमाडौं– पाठेघरको मुखको क्यान्सर विरुद्धको एचपिभी खोप अभियान अन्तर्गत १० लाख किशोरीले खोप लगाएका छन् ।

माघ २२ गतेदेखि सुरु भएको खोप अभियानमा  ६ दिनमा १० लाख १६ हजार ७७१ किशोरीले एचपीभी खोप लगाएको स्वास्थ्य तथा जनसङ्ख्या मन्त्रालयले जनाएको छ ।

मन्त्रालयका अनुसार कोशी प्रदेशमा एक लाख ८१ हजार ५०, मधेश प्रदेशमा एक लाख ४८ हजार ५६, बागमती प्रदेशमा एक लाख ९६ हजार ७४ किशोरीले खोप लगाएका छन् ।

त्यस्तै गण्डकी प्रदेशमा ८६ हजार ११२, लुम्बिनी प्रदेशमा एक लाख ८९ हजार ८७७, कर्णाली प्रदेशमा ८२ हजार ७९६, सुदूरपश्चिम प्रदेशमा एक लाख  ३२ हजार ८०४ किशोरीले एचपीभी खोप लगाएको मन्त्रालयको तथ्यांकमा उल्लेख छ । 

सरकारले माघ २२ देखि फागुन ६ गतेसम्म कक्षा ६ देखि १० सम्मका छात्रालाई र विद्यालय नजाने १० देखि १४ वर्षसम्मका १६ लाख ८८ हजार ७८६ लक्षित गर्दै एचपीभी खोप अभियान सञ्चालन गरिरहेको छ ।

प्रारम्भिक किशोरावस्थामा एचपीभी खोप लगाएमा प्रभावकारी हुने चिकित्सक बताउँछन् । अभियानमा दिइएको खोप सुरक्षित भएकाले ढुक्कसँग लगाउन चिकित्सकको सुझाव छ ।