काठमाडौँ- नेपाली कांग्रेसको क्रियाशील सदस्यता केन्द्रीय छानबिन समितिको संयोजकमा महेन्द्र यादव चयन भएका छन्।

कांग्रेसका कार्यवाहक सभापति पूर्णबहादुर खड्काले यादवलाई सदस्यता केन्द्रीय छानबिन समितिको संयोजक मनोनित गरेका हुन्। यादव कांग्रसका सह–महामन्त्री हुन्।

त्यस्तै, क्रियाशील सदस्यता केन्द्रीय छानबिन समितिको सदस्यमा तीन जनालाई मनोनित गरिएको छ। सदस्यता छानबिन समितिको सदस्यमा शिवप्रसाद हुमागाँइ, प्राडा गोविन्दराज पोखरेल, अजयवावु शिवाकोटी र शान्ति परियार विक मनोनित भएका हुन्।

नेपाली कांग्रेसको विधान, २०१७ (संशोधन सहित) को धारा २५ (९) बमोजिम कार्यवाहक सभापति खड्काले सदस्यता छानबिन समितिमा संयोजक र सदस्य मनोनित गरेको कांग्रेसका मुख्य सचिव कृष्णप्रसाद पौडेलले जानकारी दिए।

समितिले १५औं महाधिवेशनका लागि क्रियाशील सदस्यता (नयाँ र नवीकरण) को सूची र प्रतिवेदन समयभित्र अध्ययन गरी क्रियाशील सदस्यता सम्बन्धी आएका उजुरी उपर छानबिन गरी तोकिएको समयभित्र क्रियाशील सदस्यता (नयाँ र नवीकरण) को अन्तिम सूची तयार गर्नेछ।