काठमाडौं -जेन-जीको नेतृत्वमा भएको जनआन्दोलन सम्बन्धी मुद्दाहरू समाधान गर्ने उद्देश्यले जेन-जी प्रतिनिधि र नेपाल सरकारबीच भएको सम्झौतामा आज हस्ताक्षर भएको छ। सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित कार्यक्रममा जेन-जी तर्फका घाइते प्रतिनिधिहरू पनि उपस्थित थिए।

कार्यक्रममा दुवै पक्षका प्रतिनिधिले आन्दोलनका क्रममा उठेका विषय समाधान गर्ने, उपचार खर्च सुनिश्चित गर्ने र भावी समन्वय प्रक्रियालाई स्पष्ट बनाउनेबारे सहमति जनाए। घाइते प्रतिनिधिहरूले आफ्ना माग सुनेर सरकारी पक्ष अघि बढेकोमा सकारात्मक प्रतिक्रिया व्यक्त गरेका छन्।

सरकारले आन्दोलनका क्रममा घाइते भएकाहरूको उपचार, राहत तथा पुनःस्थापनामा आवश्यक सहयोग गर्ने प्रतिबद्धता व्यक्त गरेको छ। सम्झौता कार्यान्वयनका लागि संयुक्त कार्यसमिति गठन गर्ने तयारी चलिरहेको छ।