चितवन– भरतपुर अस्पतालमा सुत्केरी गराउन आएकी एक महिलाको मृत्यु भएको विषयलाई लिएर मृतकका आफन्तहरूले नारावाजी गरेका छन्।

चितवनको कालिका नगरपालिका–२ बस्ने ३० वर्षीया संगीता विकको शनिबार उपचारको क्रममा मृत्यु भएपछि परिवार र आफन्तले चिकित्सकको लापरबाही भन्दै अस्पतालमा नाराबाजी गरेका हुन् । गर्भवती संगीताको २० गते नै गर्भमा बच्चाको मृत्यु भएको भएपनि अस्पतालका चिकित्सकले समयमा नै बच्चा ननिकालिदिँदा आमाको मृत्यु भएको आफन्तहरूको आरोप छ । 

उनीहरूले संगीताको शव बुझ्न नमानेर मृत्युको कारण पत्ता लगाई चिकित्सकलाई कारबाही गर्न माग गरेका छन् । पीडित परिवारले हिजो प्रमुख जिल्ला अधिकारी गणेश अर्याललाई ज्ञापन पत्र समेत दिएका थिए ।

 तर, पीडितलाई बेवास्ता गरेको भन्दै बिहान केहीबेर नाराबाजी पछि प्रमुख जिल्ला अधिकारीसँग छलफल गरेका छन् । शनिबार राति गर्भवतीको मृत्यु भएपछि धारणा सार्वजनिक नगरेको भरतपुर अस्पतालले  विज्ञप्ति निकालेर पेटमा बच्चाको मृत्यु भइसकेपछि प्रोटोकल अनुसार औषधिको व्यथा लगाई सामान्य प्रसूति गराउने क्रममा मृत्यु भएको बताएका छन् ।

शनिबार रातिसम्म उनको गर्भमा बच्चाको मृत्यु भएको ४८ घण्टा भइसकेको थियो । अस्पतालका प्रवक्ता रामप्रसाद सापकोटाले विज्ञप्तिमा पाठेघरको मुख ५ घर खुलिसकेको अवस्थामा अचानक बेहोस भएपछि कार्डियो पल्मोनरी रिससीटेसन गरेर उपचार गर्दा मुटु र फोक्सो जोड्ने रगतको नसामा रगतको डल्लाले थुनेको कारण मुटुले रगत पम्प गर्न नपाएर मृत्यु भएको जनाएका छन् ।

साढे दुई घण्टासम्म बचाउने प्रयास गर्दा पनि नसकेको अस्पतालद्वारा जारी विज्ञप्तिमा उल्लेख छ । तर, कालिका नगर अस्पतालले बच्चा जीवित हुँदै आकस्मिक भनेर अस्पताल रेफर गर्दा पनि शल्यक्रिया गरेर बच्चा बाहिर ननिकालेका कारण उनको गर्भको बच्चाको मृत्यु भएको र सोही कारणले गर्भवतीको समेत मृत्यु भएको बिरामीको परिवारको दाबी छ ।