जनकपुरधाम– मधेश प्रदेशकी प्रदेश प्रमुख सुमित्रा सुवेदी भण्डारी सोमबार बिहान ४ बजे बिरामी भएको कारण जनाउँदै जनकपुरबाट काठमाडौंका लागि प्रस्थान गरिन् । तर उनको गन्तव्य थियो, महोत्तरीको बर्दिबासस्थित एक होटल ।

तत्कालीन केपी शर्मा ओली नेतृत्वको सरकारले प्रदेश प्रमुख बनाइएकी उनले नेपाली कांग्रेससहित बहुमत जुटाएर बसेका दललाई चक्मा दिँदै होटलबाटै एमाले संसदीय दलका नेता सराेज यादवलाई मुख्यमन्त्री नियुक्त गरिन् ।

काठमाडौं हिँडेकी उनलाई आइतबार मात्रै राजीनामा दिएका तत्कालीन कामचलाउ मुख्यमन्त्री जितेन्द्र सोनलले बिदाइ गर्दै शीघ्र स्वास्थ्यलाभको कामना गरेका थिए । उता कांग्रेसले एमालेको गठबन्धन छाडेर माओवादी र मधेसवादीको साथमा सरकार बनाउन तयार थियो । तर भण्डारीले संवैधानिक अधिकार भन्दै बर्दिबासको होटलमै यादवलाई मुख्यमन्त्री बनाइन् ।

सोमबार बिहानै अप्रत्याशित रूपमा प्रदेश प्रमुख भण्डारी बर्दिबासको पानस कटेज पुगेकी थिइन् । जहाँ उनले संविधानको धारा १६८ को उपधारा (३) अनुसार एमाले संसदीय दलका नेता यादवलाई मधेश प्रदेशको नयाँ मुख्यमन्त्रीमा नियुक्त गरिन् ।

प्रदेश प्रमुखले जारी गरेको नियुक्तिपत्रमा भनिएको छ– ‘नेपालको संविधानको धारा १६८ को उपधारा (३) बमोजिम तपाईँलाई मधेश प्रदेशको मुख्यमन्त्री पदमा नियुक्त गरेको छु । मुख्यमन्त्री पदमा नियुक्त हुनुभएकोमा हार्दिक बधाई तथा कार्यकालको सफलताको कामना गर्दछु।’

एमाले केन्द्रीय सदस्य समेत रहेका यादव २०७९ सालको निर्वाचनमा महोत्तरी क्षेत्र नम्बर ४ (१) बाट निर्वाचित भएका थिए ।

प्रदेश प्रमुखको कदमले मधेश प्रदेशको राजनीतिक वातावरण फेरि तातिएको छ । एमालेले यसलाई संविधानसम्मत निर्णय भन्दै स्वागत गरेको छ भने अन्य दलहरूले प्रक्रियामाथि प्रश्न उठाएका छन् ।