काठमाडौं– भदौ २४ गते सत्ताबाट बाहिरिएको नेकपा एमालेले सुशीला कार्की नेतृत्वको वर्तमान सरकारको क्रियाकलापप्रति गम्भीर ध्यानाकर्षण भएको जनाएको छ ।

भक्तपुरको गुण्डुस्थित अध्यक्ष केपी ओलीको निवासमा शुक्रबार बसेको एमाले सचिवालय बैठकले वर्तमान सरकार निर्वाचन गराउने बाटोमा नभई मुलुकलाई अनावश्यक तिक्तता, तनाव र मुठभेटतिर लैजान उद्यत भएकाले पार्टीको गम्भीर ध्यानाकर्षण भएको उपमहासचिव प्रदीप ज्ञवालीले बताए ।

प्रहरीमाथि आक्रमण गर्ने र हतियार लुट्नेलाई गृहमन्त्री ओमप्रकाश अर्यालको दबाबमा छाड्ने तर शान्तिपूर्ण प्रदर्शन गर्न खोज्दा दलहरूलाई रोक्ने र नेताहरूलाई स्थानहद तोक्ने सरकारको कामप्रति गम्भीर आपत्ति रहेको उनले बताए । 

ज्ञवालीले तोकिएको समयमा निष्पक्ष निर्वाचन गराउन सरकार लाग्न नसकेकाले सरकार राजनीतिक अस्वस्थता बढाउन लागेको  आशंका रहेको उल्लेख गरे । 

बैठकमा जेन-जी आन्दोलनपछिको अवस्थाबारे सघन रूपमा छलफल भएको उनले बताएका छन् । ज्ञवालीले जेन-जी युवाका आवाज स्वाभाविक भए पनि आन्दोलनका नाममा भएको घटनाको गम्भीरताका साथ छानबिन हुनुपर्नेमा एमालेको जोड रहेको बताए ।

उनले जेन-जी आन्दोलनलाई आधार बनाएर भाद्र २४ गते भएको घटना लोकतन्त्र, संविधान र इतिहासप्रतिकै ठूलो आक्रमण भएकाले सत्य तथ्य छानबिन हुनुपर्ने उल्लेख गरे । 

त्यस्तै एमालेको महाधिवेशन छिटै आयोजना गर्नुपर्नेमा नेताहरूको जोड रहेको उल्लेख गर्दै उनले शनिबार बस्ने पदाधिकारीको बैठकले महाधिवेशनको प्रस्ताव तयार गर्ने जानकारी दिए ।