काठमाडौं– नेपालमा विद्युतीय गतिशीलतालाई सुदृढ बनाउनका लागि कुमारी बैंक लिमिटेड र (जीआईजेड) गेसेलशाफ्ट फर इन्टरनेस्नल जुसमेनारबिटबीच नेपालको लागि दिगो विद्युतीय यातायात (एसईटी४एनपीएल) परियोजनाअन्तर्गत एमओयूमा हस्ताक्षर भएको छ । 

यो सहकार्यले सार्वजनिक यातायात सञ्चालकहरूलाई किफायती वित्तीय पहुँच उपलब्ध गराउँदै विद्युतीय सार्वजनिक यातायात-विशेषगरी विद्युतीय माइक्रो तथा मिनी बसहरूको (ईएमबीएस) स्वीकृति र सञ्चालनलाई तीव्र बनाउन लक्षित वित्तीय संयन्त्र र डिजिटल नवप्रवर्तनलाई सहयोग पुर्‍याउने विश्वास गरिएको छ ।

एसईटी४एनपीएल परियोजना  जीआईजेड नेपाल र ग्लोबल ग्रिन ग्रोथ इन्स्टुचुट (जीजीजीआई) द्वारा भौतिक पूर्वाधार तथा यातायात मन्त्रालयसहितका सरकारी तथा सम्बन्धित साझेदार संस्थाहरूसँगको सहकार्यमा कार्यान्वयन भइरहेको संयुक्त पहल हो । 

यो परियोजना मिटिगेसन एक्सन फ्यासिलिटि (एमएएफ)को आर्थिक सहयोगमा सञ्चालन भइरहेको छ र यस कार्यक्रमले करिब ३,५०० विद्युतीय मिनीबस (ईएमबीएस) सञ्चालनमा ल्याउने लक्ष्य राखेको छ ।  

यो सहकार्यले सार्वजनिक यातायात व्यवसाय गर्नेहरूलाई विद्युतीय माइक्रो र मिनीबस (ईएमबीएस) प्रयोग गर्न सहज बनाउने  बंकले जनाएको छ ।