काठमाडौं– जेनजी आन्दोलनपश्चात गृह मन्त्रालयको जिम्मेवारीमा आएपछि ओमप्रकाश अर्यालले सामाजिक सुरक्षा सामाजिक सुरक्षा वितरण कार्यविधि, २०८२ जारी गरेका छन् । जिम्मेवारी सम्हालेको एक महिना नहुँदै मन्त्री अर्यालले सामाजिक सुरक्षा भत्ता वितरण कार्यविधि, २०७७ लाई खारेज गर्नेगरी नयाँ कार्यविधि जारी गरेका हुन् ।

नयाँ जारी गरिएको कार्यविधिमार्फत बायोमेट्रिक भेरिफिकेसन मार्फत गर्ने स्थानीय तहबाट सामाजिक सुरक्षा भत्ताको लागि लाभग्राहीले अनलाइनबाटै निवेदन दिनसक्ने र नवीकरण गर्नसक्ने व्यवस्था मिलाइएको छ । बायोमेट्रिक भेरिफिकेसनको लागि पनि कार्यविधिले कसरी गर्न सकिने भनेर स्पष्ट व्यवस्था गरेको छ ।

साथै, नयाँ कार्यविधिअनुसार सामाजिक सुरक्षा भत्ता प्राप्त गरिरहेका लाभग्राहीले भत्ता निरन्तर प्राप्त गर्नको लागि वडा कार्यालयमा निवेदन दिनुपर्ने तथा नवीकरणको लागि मोबाइल एप्लिकेसनमार्फत पनि भेरिफिकेसन गर्न सकिन्छ ।

गृह मन्त्रालयले नयाँ कार्यविधिमार्फत भत्ता पाउन योग्य जातिसँग विवाह गरेको महिलाको वैवाहिक सम्बन्ध कायम नरहेमा ती महिलाले सामाजिक सुरक्षा भत्ता नपाउने व्यवस्था गरेको छ ।

कार्यविधिले सामाजिक सुरक्षा भत्ताको अभिलेखबाट नाम हटाउने र लगत कट्टा गर्ने काम प्रमुख प्रशासकीय अधिकृतको निर्णयबाट गराउनुपर्ने व्यवस्था गरेको छ ।

साथै, ल्याइएको नयाँ कार्यविधिले लाभग्राहीको खातामा भत्ता वापतको रकम जम्मा गर्नुपर्ने मिति पनि ठोस गरेको छ । कार्यविधिअनुसार बैंकले लाभग्राहीको खातामा रकम जम्मा गरिससकेपछि पहिलो त्रैमासिकको कात्तिक ७ गतेभित्र, दोस्रो त्रैमासिकको माघ ७ गतेभित्र, तेस्रो त्रैमासिकको वैशाख ७ गतेभित्र र चौथो त्रैमासिकको असार मसान्तभित्र वा मासिक रूपमा वितरण भएको भए अर्को महिनाको ७ गतेभित्र लाभग्राहीको खातामा रकम जम्मा गरेर स्थानीय तहलाई विवरण बुझाउनुपर्ने हुन्छ ।

कार्यविधिले निर्देशक समिति, जिल्ला सहजीकरण समिति र स्थानीय सहजीकरण समितिको भूमिका पनि ठोस गरेको छ । साथै, अनुगमन, निरीक्षण तथा प्रतिवेदन सम्बन्धी व्यवस्था र पारदर्शिता तथा जवाफदेहिता सम्बन्धी पनि केही नयाँ व्यवस्था गरेको छ ।

सामाजिक सुरक्षा सामाजिक सुरक्षा वितरण कार्यविधि, २०८२ को पूर्णपाठ