काठमाडौं – नेपाल तरुण दलले जेन्जी आन्दोलनका क्रममा भएको हिंसा र विनाशका घटनाबारे गम्भीर चिन्ता व्यक्त गर्दै शान्ति, अमनचयन र सार्वजनिक सम्पतिको सुरक्षा सुनिश्चित गर्दै उचित निकास दिन सरोकारवालासँग आग्रह गरेको छ।

तरुण दलका अध्यक्ष फेस्ट विद्वान गुरुङको नेतृत्वमा जारी विज्ञप्तिमा भदौ २४ गते भएका घटनामा विद्यार्थी, युवाहरू र सुरक्षाकर्मीको मृत्युप्रति दुःख व्यक्त गर्दै भावपूर्ण श्रद्धाञ्जली अर्पण गरिएको छ। साथै घाइते पत्रकार, प्रहरी, विद्यार्थी र युवाहरूको शीघ्र स्वास्थ्य लाभको कामना गरिएको छ।

विज्ञप्तिमा भनिएको छ, “अदरणीय शेरबहादुर देउवा र डा. आरजु राणाज्यूको निवासमा साङ्घातिक आक्रमण हुनु नियोजित हत्याको प्रयास हो। उहाँहरूको रक्षार्थ अग्रपंक्तिमा उभिएर सुरक्षित स्थानमा पुर्याएर उपचारमा सहयोग गर्ने हृदययुक्त योद्धाहरूलाई नेपाल तरुण दलले हार्दिक सम्मान गर्दछ।”

पत्रमा आन्दोलनको क्रममा भएको लुटपाट, आगजनी र सिंहदरबार, सर्वोच्च अदालत लगायत राज्यका महत्वपूर्ण संरचनाको क्षतिले देशको सुरक्षा र अर्थव्यवस्थामा गम्भीर असर परेको उल्लेख छ। यस परिस्थितिमा राष्ट्रियता, लोकतन्त्र र संविधानको मर्म र भावनालाई आत्मसात गर्दै देशलाई निकास दिन आवश्यक भएको विज्ञप्तिमा जोड दिइएको छ।

नेपाल तरुण दलले देशभरका तरुणहरूलाई “सर्वोच्चता, अखण्डता र सामाजिक एकताको रक्षार्थ एकताको सूत्रमा बाधिनु जरूरी” भएको बताउँदै लोकतन्त्रको मूल्य र सार्वजनिक सम्पतिको संरक्षण सुनिश्चित गर्न सबै सरोकारवालालाई आग्रह गरेको छ।