म्याग्दी – म्याग्दीमा कारागारबाट भागेका २५ जना कैदीबन्दीलाई प्रहरीले नियन्त्रणमा लिएको छ ।

बेनी नगरपालिका–२ खबरामा रहेको म्याग्दी जिल्ला कारागारबाट भागेका २३ जना र कास्की कारागारबाट भागेर आएका दुई जनालाई नियन्त्रणमा लिएको जिल्ला प्रशासन कार्यालय, म्याग्दीले जनाएको छ ।

म्याग्दी कारागारबाट ७२ जना कैदीबन्दीहरू बुधबार बिहान भागेका थिए । कैदीबन्दी भागेपछि बिहान साढे १० बजेदेखि बेनी बजार र आसपासको क्षेत्रमा प्रशासनले निषेधाज्ञा जारी गरेको छ । भागेका कैदीबन्दीको खोजीमा सुरक्षाकर्मी परिचालन भएका छन् ।

अठासी जना कैदीबन्दी रहेको कारागारमा बिरामी र हिड्न नसक्ने १२ जना भाग्न सकेनन् । चार जनालाई प्रहरीले भाग्ने क्रममा नियन्त्रणमा लिएको थियो । बिहान सात बजेतिर हुलदङ्गा गर्दै मोटरसाइकल र स्कुटर चढेर कारागारमा पुगेका समूहले कैदीबन्दीहरूलाई सवारी साधनमा राखेर भगाएका थिए ।