काठमाडौँ – मेडिकल व्यवसायी तथा राजावादी आन्दोलनका पूर्वकमाण्डर दुर्गा प्रसाईँले देशको पछिल्लो अवस्था र आगामी बाटोबारे प्रधानसेनापति अशोकराज सिग्देलसँग दिनभर छलफल गरेको दाबी गरेका छन्‌ ।

जेन-जी आन्दोलनकारीसँगै प्रसाईँ पनि सैनिक मुख्यालय जङ्गीअड्डामा छलफल गर्न भन्दै पुगेका थिए । सेनापति सिग्देलले उनीसँग कुराकानी गरेका थिए ।

सेनापतिसँगको फोटो सार्वजनिक गर्दै प्रसाईँले फेसबुकमा लेखेका छन्‌, ‘आज दिनभर प्रधानसेनापति अशोकराज सिग्देलसँग देशको पछिल्लो अवस्था र आगामी बाटोबारे गहिरो छलफल भयो, यस लामो छलफलपछिको मेरो निष्कर्ष स्पष्ट छ – मलाई नेतृत्वको मोह छैन ।’

देशलाई जसरी निकास मिल्छ, त्यही नै आफ्नो प्राथमिकता भएको प्रसाईँले लेखेका छन्‌ । जेन-जी पुस्ताको आवाजलाई सम्मान गर्दै बालेन शाह वा शुशीला कार्की लगायत जोसुकै तयार भएपनि आफूले उनीहरूको नेतृत्व स्वीकार्ने तर्क पनि उनको छ ।

‘तर, कोही पनि अगाडि नबढ्दा पिठ्युँ देखाएर भाग्नु मेरो स्वभाव होइन, म जुनसुकै परिस्थितिको लागि पनि तयार छु, आजको बिषम घडीमा म सस्तो राजनीति र टिकाटिप्पणीमा लाग्दिनँ’, प्रसाईँले लेखेका छन्‌, ‘अब चाहिएको कुरा हो — गम्भीरता, राष्ट्रिय एकता र रचनात्मक बाटोको खोज । सहज निकासका लागि सबैको साथ र सुझाव अपरिहार्य छ ।’

प्रसाईँको फेसबुक पोष्ट :

पछिल्लो भेटलाई लिएर प्रसाईँ र प्रधान सेनापति सिग्देलको आलोचना भइरहेको छ । प्रसाईँले केहीअघि तीनकुनेमा भएको अराजक प्रदर्शनको नेतृत्व गरेका थिए । उनले बैङ्क तथा वित्तीय संस्थाबाट अर्बौँ रुपैयाँ कर्जा लिइ त्यस्तो कर्जा नतिर्न सर्वसाधारणलाई उक्साएका थिए ।

उता, जेन-जी समूहबीच भावी सरकारको नेतृत्व कसलाई दिने भन्नेबारे यतिखेर जङ्गीअड्डाको प्रवेशद्वारमा वादविवाद भइरहेको छ । जेन-जीहरूको भर्चुअल बैठकले अपराह्न पूर्वप्रधानन्यायाधीश सुशीला कार्कीको नाम अन्तरिम सरकार प्रमुखका रूपमा अघि सार्ने सहमति जुटाएका थिए ।