काठमाडौं– नेपाली कांग्रेसका पूर्व महामन्त्री कृष्णप्रसाद सिटौलाले राजनीतिक दलका नेताहरू र नागरिक समाजलाई भावनात्मक रूपमा एकताबद्ध हुन अपिल गरेका छन् । 

उनले बिहीबार विज्ञप्ति जारी गरेर अहिलेको विषम परिस्थितिमा उच्च मनोबलका साथ सतर्क रही भावनात्मक रूपले एकताबद्ध हुन दलका नेताहरू र नागरिक समाजलाई अपिल गरेका हुन् । 

‘यो अत्यन्त दुःखद घडीमा संयम र धैर्यताका साथ उच्च मनोबलसहित  सतर्क, सजग र  भावनात्मक रूपले एकताबद्ध रहन सबै राजनीतिक दलका साथीहरू, नागरिक समाज एवम् देशभरका तमाम दिदीबहिनी, दाजु–भाइहरूमा हार्दिक अपिल गर्दछु,’ सिटौलाले भनेका छन् ।  

देश अचानक र अप्रत्याशित ढंगले आतंकित भएको र अत्यन्त ठूलो कष्ट र पीडा देशवासी सबैले बेहोर्नु परेको नेता सिटौलाको भनाइ छ । 

‘देशमा शान्ति सुव्यवस्था कायम गरी नेपाल र नेपाली जनताको जीउधनको सुरक्षा गर्न सम्बद्ध सबै पक्षसँग हार्दिक अनुरोध गर्दछु,’ उनले विज्ञप्तिमार्फत् भनेका छन् ।