काठमाडौँ – मंगलबारको राजनीतिक उथलपुथलपछि नेकपा (एमाले) का सांसद पदम गिरीले धारणा सार्वजनिक गरेका छन्। उनले शान्तिपूर्ण ढंगले अघि बढेको जेन-जी आन्दोलनलाई स्वार्थी समूहले भड्काएको भन्दै दुःख व्यक्त गरेका छन्।

‘देशमा सुशासन कायम होस्, विकासको मूल फुटोस् र युवाले आफ्नै देशमा सम्मानित र सुरक्षित जीवन खोज्न सकून् भन्ने पवित्र उद्देश्यसहित नयाँ पुस्ता (जेन‍-जी) सडकमा उत्रिएका थिए। तर सोमबार र मंगलबारको आन्दोलनमा स्वार्थी समूह घुसेर भड्काउने काम भयो।’

उनले एकातिर सुरक्षानिकायले संयमता देखाउन नसकेको र अर्कातिर विदेशी शक्तिहरू तथा जेलजीवन भोगिरहेका अपराधीहरूले अवसरको खोजी गरेको दाबी गरे। गिरीले आन्दोलनकै क्रममा १९ जनाको ज्यान जानु केवल परिवारकोनभई सिङ्गो राष्ट्रकै साझा पीडा भएको उल्लेख गरे।

प्रधानमन्त्री केपी शर्मा ओलीले राजीनामा दिएपछि सिंहदरबार, संसद्, अदालत, राष्ट्रपति भवनदेखि विद्यालय, अस्पताल, बैंक र निजी सम्पत्तिसमेत जलाइएको गम्भीर अवस्थाप्रति उनले चिन्ता व्यक्त गरे। राज्यका जिम्मेवार निकायहरू मुकदर्शक बनिदिनु डरलाग्दो विषय भएको उनले बताएका छन् ।

सांसद गिरीले नयाँ पुस्ताले लोकतन्त्रसहितको समृद्ध नेपाल चाहेको स्पष्ट गर्दै सबैलाई सकारात्मक योगदान दिन आह्वान गरे। उनले आफ्ना निकृष्ट स्वार्थ पूर्ति गर्न गिद्धे दृष्टि नराख्न चेतावनीसमेत दिएका छन् ।

गिरीले जेन-जी आन्दोलनका क्रममा ज्यान गुमाएका व्यक्तिहरूप्रति श्रद्धाञ्जली दिँदै परिवारजनप्रति समवेदना प्रकट गरेका छन्। घाइतेहरूको निशुल्क उपचारको माग गर्दै शीघ्र स्वास्थ्यलाभको कामना पनि उनले गरेका छन्।