काठमाडौँ- मंगलबार देशभर भएको विध्वंशपछि पनि लुटपाट रोकिएको छैन। बुधबार नेपाली सेनासहितका सुरक्षा निकाय परिचालन हुँदा पनि संघीय राजधानी र जिल्लामा लुटपाट र आपराधिक गतिविधि रोकिएका छैनन् ।

काठमाठडौँको महाराजगञ्जस्थित भाटभटेनी सुपरमार्केटमा भएको लुटपाटमा संलग्न ४ जनालाई बुधबार बिहान १० बजेदेखि दिउँसो १ बजेसम्मको बीचमा नेपाली सेनासहितका सुरक्षाअधिकारीले पक्राउ गरेका छन् ।

त्यसैगरी, डिल्लीबजार–नारायणथान क्षेत्रमा शंकास्पद गतिविधिमा संलग्न व्यक्तिहरूले सुरक्षा फौज देखेपछि छाडेर भागेको २३ लाख २५ हजार नेपाली रुपैयाँ र अमेरिकी डलर २५०० सुरक्षाकर्मीले बरामद गरेका छन्।

यसबीचमा सुरक्षाकर्मीहरूले लुटिएका थप एक नालसहित हालसम्म ३२ नाल हतियार फिर्ता गर्न सफल भएका छन्।

यस्तै, डडेलधुरास्थित जिल्ला कारागारबाट निस्केका कैदीमध्ये २६ जनालाई नियन्त्रणमा लिइएको छ । काठमाडौँको डिल्लीबजारस्थित सदर कारागारबाट भाग्ने प्रयासलाई पनि सेनाले रोकेको छ।

सुरक्षा निकायले राजधानीलगायत देशभर निगरानी थप कडा पारेका नेपाली सेनाले जनाएको छ । बाँकी घटनामा समेत संलग्नलाई चाँडै कानूनी दायरामा ल्याइने सेनाले जनाएको छ।