काठमाडौँ – मङ्गलबार बेलुकी १० बजेदेखि देशको सुरक्षा कमाण्ड सम्हालेको नेपाली सेनाले काठमाडौँ उपत्यका लगायत देशका विभिन्न ठाउँमा कडा सुरक्षा चेकजाँच गरिरहेको छ ।

सेना सुरक्षार्थ सडकमा निस्कँदा हिँडडुलमा कडाइ भएको छ । अत्यावश्यक काम नपरेसम्म घरबाट बाहिर ननिस्किन सेनाले आग्रह गरेको छ । आफ्नो वास्तविक परिचयपत्र बोकेकालाई मात्र संवेदनशील क्षेत्र हुँदै आवतजावत गर्न दिएको छ ।

विध्वंशकारी गतिविधि रोक्न र शान्तिसुरक्षा कायम राख्न भन्दै सेनाले बुधबार बिहानैदेखि चेकजाँचलाई थप कसिलो बनाएको हो । जेन-जी आन्दोलनका नाममा लुटपाटमा सङ्लग्न कम्तिमा २६ जनालाई सेनाले काठमाडौँबाट पक्राउ गरी सेनालाई बुझाइसकेको छ ।

नेपाली सेनासँगै हाल सशस्त्र प्रहरी बल नेपाल, नेपाल प्रहरी र राष्ट्रिय अनुसन्धान विभागले सुरक्षा व्यवस्था निम्ति फिल्डमा सुरक्षाकर्मीको बाक्लो तैनाथी गरेको छ ।