काठमाडौं – नायिका नीता ढुङ्गानाले ‘निर्देशनमा डेब्यू गर्छु’ भनी सार्वजनिक अभिव्यक्ति दिएको चार वर्ष बढी भयो ।

०७८ साल मंसिरमा एक सार्वजनिक कार्यक्रममा आफूले फिल्म निर्देशन गर्ने र त्यसबेला प्रेमी रहेका हरिहर अधिकारीलाई हिरो राख्ने नीताले बताएकी थिइन् । अहिले यी दुई विवाह बन्धनमा छन् ।

गत वर्ष प्रदर्शनमा आएको फिल्म ‘ह्रस्व दीर्घ’बाट पनि नीताले निर्देशनमा डेब्यू गर्ने चर्चा नचलेको होइन । तर, ठूलो बजेटको फिल्म बन्ने भएपछि आफूले आँट नगरेको नीताले बताएकी थिइन् । यस फिल्मबाट उनले निर्माण भने डेब्यू गरिन् ।

अहिले नीता नायिका भन्दा निर्देशकका रुपमा चर्चामा छिन् । उनले आफ्नै ब्यानर ‘नीता फिल्मस्’बाट फिल्म ‘पार्वती’ र ‘सुख दुःख’ निर्माणको घोषणा गरेकी छन् । यी दुवै फिल्ममको निर्देशन आफैँले गर्ने उनको घोषणा छ ।

उनले गत असारमा ‘सुख दुःख’ निर्माणको घोषणा गरेकी हुन् । अहिले यस फिल्मको काम कलाकार र प्राविधिक चयनमा नै छ । फिल्ममा मदकृष्ण श्रेष्ठ, मिथिला शर्मा, विपना थापा र भारतीय कलाकार दीपराज राणा अनुबन्ध भइसकेका छन् । शीर्ष कलाकारहरु उनले गोप्य नै राखेकी छन् ।

यो फिल्मको छायाङ्कन फागुन १ गतेबाट सुरु गर्ने योजनामा नीता रहेकी छन् । यो फिल्मले नीताको डेब्यू निर्देशनका रुपमा चर्चा पाएको छ । प्रदर्शन मिति ०८३ को दशैँलाई तोकिएको छ ।

नीताले ‘सुख दु:ख’लाई ‘नीता फिल्मस्’को दोस्रो प्रस्तुति किटान गरेकाले उनको डेब्यू निर्देशन यहीबाट हुने सन्देश गएको थियो ।

तर, नीताले जनै पूर्णिमाको अवसर पारेर फिल्म ‘पार्वती’ निर्माणको घोषणा गरेकी छन् । आफू फिचर्ड पोस्टर सार्वजनिक गर्दै उनले यस फिल्म निर्माणबारे जानकारी दिएकी हुन् ।

यो फिल्मको प्रदर्शन मिति यही वर्षको माघ १ लाई तोकिएको छ । यो फिल्मको कथा लेखक, निर्देशक र शीर्ष नायिका नीता नै रहनेछिन् ।

अर्थात्, प्रदर्शन मिति हेर्दा नीताको दोस्रो पटक घोषणा गरेको फिल्म ‘पार्वती’ उनको डेब्यू निर्देशनमा बन्ने देखिन्छ । यो फिल्मको प्रदर्शन मितिभन्दा एक महिना ढिला मात्रै ‘सुख दुःख’को छायाङ्कन हुने बताइएको छ ।

पूर्वनिर्धारित योजनामै नीताले यी दुई प्राजेक्टको थलानी गरे ‘पार्वती’बाट उनको निर्देशन यात्रा सुरु हुने देखिन्छ ।